«Toshkent dengizi» dam olish maskanida 2 kishiga o‘q uzgan shaxs qidirilmoqda

«Toshkent dengizi» dam olish maskanida pnevmatik to‘pponchadan ikki kishiga o‘q otib jarohatlagan shaxs qidirilmoqda. Bu haqda O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasi xabar qildi.

Xabarda aytilishicha, Toshkent viloyatining O‘rtachirchiq tumanida 12 iyul kuni «Toshkent dengizi» dam olish maskanidagi «Hayrixon omad-savdo» MChJ ishchisi Akobir Ro‘zimboyev dam olish maskani hududida joylashgan avtoturargohda yollanib ishlayotgan M.Z. va F.I.larga o‘q otib jarohat yetkazgan va voqea joyidan qochib ketgan.

«Jarohat olgan ishchilarga tibbiy yordam ko‘rsatilgan. Akobir Ro‘zimboyevni ushlash choralari ko‘rilgan», - deyiladi xabarda.

Fuqarolardan Akobir Ro‘zimboyevning qayerdaligi yoki u haqida biron ma'lumotga ega bo‘lgan taqdirda ichki ishlar organlarining hududiy bo‘limlariga yoki «102» telefon raqamlariga qo‘ng‘iroq qilishlari so‘ralmoqda.