O‘zbekiston va Qatar to‘g‘ridan-to‘g‘ri aviareyslarni yo‘lga qo‘yishni muhokama qilmoqda

Tashqi savdo vazirligida Qatar Savdo-sanoat palatasi yuridik boshqarma boshlig‘i Abdulaziz al-Quvariy boshchiligidagi Qatar davlati delegatsiyasi bilan uchrashuv bo‘lib o‘tdi. Bu haqda vazirlik matbuot xizmati xabar berdi.

Tomonlar ikki tomonlama savdo-iqtisodiy va transport-kommunikatsiya aloqalarini rivojlantirish istiqbollarini muhokama qilgan.

Uchrashuvda eksportni rivojlantirish, xususan, avtomobillar va yuk mashinalari, elektr tovarlar, kimyoviy moddalar, yangi va qayta ishlangan meva-sabzavot mahsulotlarini Qatarga yetkazib berish imkoniyati bo‘yicha fikr-mulohazalar bildirib o‘tilgan.

Shuningdek, uchrashuvda transport va kommunikatsiya tizimini rivojlantirish masalasiga alohida e'tibor qaratilgan. Xususan, yirik shaharlar o‘rtasida to‘g‘ridan-to‘g‘ri aviareyslarni yo‘lga qo‘yish taklif etilgan.

Uchrashuv yakunida tomonlar savdo-iqtisodiy sohadagi hamkorlikni yanada mustahkamlash bo‘yicha chora-tadbirlarni davom ettirishga kelishib olgan.