Kubada prezident lavozimi ta'sis etilishi kutilyapti

Kuba Xalq hokimiyati milliy assambleyasi (bir palatali parlament) shanba kuni mamlakatning yangi konstitutsiyasini ko‘rib chiqish va tasdiqlash uchun yalpi majlisga yig‘iladi.

Hozir amalda bo‘lgan asosiy qonun Kubada 1976 yilda, mamlakatga Fidel Kastro (1926-2016) rahbarlik qilganida qabul qilingan. Kubada o‘shandan beri jiddiy iqtisodiy va ijtimoiy o‘zgarishlar yuz berdi, ular konstitutsiyada mustahkamlab qo‘yilishni nazarda tutadi. Shu bilan birga, Kuba hukumatining bir necha bor ta'kidlaganidek, markaziy prinsiplardan biri - davlatning sotsialistik xarakteri va jamiyat hayotida Kommunistik partiyaning rahbarlik roli - bu yangi konstitutsiyada ham o‘zgarishsiz qoladi.

Parlament majlisi 23 iyulga qadar davom etadi. Hujjat deputatlar tomonidan ma'qullangach, referendumga olib chiqiladi. Umumxalq ovoz berish qachon bo‘lib o‘tishi hozircha ma'lum qilinmagan. Kutilishicha, u joriy yilning oxiriga qadar o‘tkaziladi.

Yangi konstitutsiya matni e'lon qilinmadi, biroq Kuba Kommunistik partiyasi MQning Granma gazetasi asosiy qonunga qanday muhim o‘zgartirishlarni kiritish nazarda tutilayotgani haqida xabar berdi.

Mavjud konstitutsiyaga muvofiq, Davlat kengashi va Vazirlar kengashi raisi davlat rahbari hisoblanadi. Aprel oyidan buyon Migel Dias-Kanel bu lavozimni egallab turibdi.

Yangi konstitutsiyada mamlakat prezidenti lavozimini ta'sis etish nazarda tutilmoqda. U davlat rahbari vazifalarini bajaradi va Milliy assambleya deputatlari tomonidan ketma-ket ikki martadan ortiq bo‘lmagan holda besh yil muddatga saylanishi mumkin.

Bundan tashqari, yangi konstitutsiyada bosh vazir lavozimini ta'sis etish belgilangan, u Kubadagi oliy ijroiya organi - Vazirlar kengashiga rahbarlik qiladi. Shunday qilib, mamlakatda davlat rahbari va hukumat boshlig‘i lavozimi ajratiladi. Bosh vazirni saylash yoki tayinlash jarayoni qanday amalga oshirilishi aniq ko‘rsatilmagan.

Yangi konstitutsiyada «erkin bozor va mulkchilikning yangi shakllari, shu jumladan, xususiy mulkni» tan oluvchi band paydo bo‘ladi, biroq asosiy ishlab chiqarish vositalari davlat tasarrufida bo‘lishi saqlanib qoladi.

Bundan tashqari, yangi konstitutsiya «xorijiy sarmoyalarning mamlakat iqtisodiy rivojlanishi uchun muhimligi»ni tan oladi. Kuba hukumatiga ko‘ra, Ozodlik oroli milliy iqtisodiyotini rivojlantirish uchun yiliga 2,5 milliard dollardan ko‘proq xorijiy investitsiyalar talab qilinadi.