Senatning 2-oktabrdagi xabariga koʻra, majlisda «Oʻzbekiston Respublikasining Konstitutsiyaviy sudi toʻgʻrisida»gi Konstitutsiyaviy qonun atroflicha muhokama qilingan.
Qonun yangilangan Konstitutsiya normalarini amaliyotga tatbiq etish va fuqarolarning konstitutsiyaviy odil sudlovdan foydalanish imkoniyatlarini kengaytirishga qaratilgan.
Muhokamada amaldagi qonunchilikda raqamli texnologiyalardan foydalanish va murojaatlarni dastlabki koʻrib chiqish boʻyicha huquqiy boʻshliqlar mavjudligi qayd etilgan.
Sud majlislarini onlayn kuzatish mumkin boʻladi
Qonun bilan Konstitutsiyaviy sud faoliyatiga axborot tizimini joriy etish nazarda tutilmoqda. U orqali murojaatlarni elektron shaklda yuborish va jarayonni onlayn kuzatish imkoniyati yaratiladi.
Shuningdek, video-konferens-aloqa va mobil ilova orqali sudda ishtirok etish, ochiq sud majlislarini esa internetda jonli efirga uzatish koʻzda tutilgan.
Murojaatlar dastlab 15 kunda oʻrganiladi
Kelib tushgan murojaatlarni 15 kunlik muddatda dastlabki tarzda oʻrganish tartibi belgilanmoqda. Bu muddat ish boʻyicha yakuniy qaror chiqarishga emas, murojaatni dastlabki koʻrib chiqishga tegishli.
Konstitutsiyaviy sudga taalluqli boʻlmagan murojaatlarni vakolatli organlarga yuborish yoki qabul qilishni rad etish haqida ajrim chiqarish tartibi ham yoʻlga qoʻyilmoqda.
Mazkur oʻzgarishlar fuqarolar va yuridik shaxslarning ovoragarchiligini kamaytirish hamda murojaatlarni koʻrib chiqish muddatlarini aniq belgilashga qaratilgan.
Konstitutsiyaga zid hujjat uch oyda muvofiqlashtirilishi shart
Qonunda Konstitutsiyaviy sud qarorlarini ijro etish mexanizmi ham kuchaytirilmoqda.
Konstitutsiyaga zid deb topilgan normativ-huquqiy hujjatni qabul qilgan organ uni uch oy ichida Konstitutsiyaga muvofiqlashtirishi shartligi belgilanmoqda.
Bunday hujjatlar asosida chiqarilgan sud qarorlarini qayta koʻrib chiqish tartibiga ham aniqlik kiritilmoqda.
