OAV: Rossiyada «eng qurollangan» kema qurilmoqda

Rossiyada «Shkval» toifasidagi yangi esminets ishlab chiqilmoqda, u eng ko‘p sonli og‘ir qurolga ega kemaga aylanishi mumkin. Bu haqda Military Watch jurnali xabar tarqatgan.

Nashr ma'lumotlariga ko‘ra, kema S-500 va S-350 zenit raketa majmualarining modifikatsiyalangan «dengiz» variantlari, «Redut» zenit raketa majmuasi, hamda «Pantsir-M» yaqin masofalarga mo‘ljallangan raketa artilleriya majmuasi bilan jihozlangan bo‘ladi.

Shuningdek, esminets «Kinjal» majmuasida qo‘llaniluvchi gipertovushli raketalar, «Tsirkon» gipertovushli raketalari va «Kalibr» qanotli raketalariga ham ega bo‘lishi mumkin.

Ta'kidlanishicha, loyiha Shimoliy konstruktorlik byurosi tomonidan 2015 yildan beri ishlab chiqilmoqda, yangi esminets 2020 yildan so‘ng foydalanishga topshirilishi rejalashtirilgan.