DXA davlat organlari mas'ul xodimlariga nisbatan dastlabki ma'muriy javobgarlikka tortish chorasini qo‘lladi

O‘zbekiston Respublikasining MJtK 215-5-moddasida nazarda tutilgan huquqbuzarlikni sodir etganlik yuzasidan Davlat xizmatlarini ko‘rsatuvchi vakolatli davlat organlari mas'ul xodimlariga nisbatan davlat xizmati ko‘rsatish muddatini buzganlik uchun dastlabki  ma'muriy javobgarlikka tortish chorasi ko‘rildi.

O‘zbekiston Respublikasi prezidenti tomonidan 2018 yil 23 iyul kuni imzolangan “Ba'zi davlat organlari va tashkilotlarning faoliyati takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi O‘zbekiston Respublikasi Qonuniga binoan davlat xizmatlari ko‘rsatish sohasidagi ma'muriy huquqbuzarliklar to‘g‘risidagi ishlarni ko‘rib chiqish ma'muriy sudlardan Agentlik va uning hududiy boshqarmalariga o‘tkazilgan edi.

Davlat xizmatlari agentligi (DXA) Toshkent shahar boshqarmasi tomonidan “GRAND AMIR BARAKA”, “DAVR STANDART”, “GIJDUVON TANSIQ TAOMLARI”, “TABARRUK SAVDO”, “ARZANDA”, “DINNER FAMILY COMPANY”, “ALL BOSS SERVICE”, “STRONG BEER”, “INTERFOOFSERVICE”, “MOMENTO TASHKENT”, “OSIYO ELIT SERVIS”, “DILNOZA SAVDO”, “AMAZON TOUR”, “MUJIZA PATIR TAOMLARI”, “SAMARQAND ASL KISHONASI”, “SUNSHINE TURON INTERNATIONAL LTD”, “DILOROM A.O.O”, “SHARQ GUZAR SERVIS”, “MANGOLIA TRADE”, “SAVDOGAR INVEST” mas'uliyati cheklangan jamiyatlari hamda “REAL FOOD LINE”. “ART FOOD MASTER”, “OSIYO DAVRON”, “ORIENTAL FOOD LINE” xususiy korxonalarining umumiy ovqatlanish obektlariga alkogolli mahsulotlarni sotish huquqi uchun ruxsat guvohnomasi olish uchun qilgan murojaatlarini ko‘rib chiqish muddatini buzib, qonun buzilishi holatlariga yo‘l qo‘yganliklari uchun Toshkent shahri Shayxontohur tuman hokimligining mansabdor shaxslari ma'muriy javobgarlikka tortilib, ularga nisbatan eng kam oylik ish haqining besh baravari, ya'ni 921 500 so‘m miqdorida jarima solindi.