Papa Johnʼs asoschisi iste'foga chiqarilganidan so‘ng o‘z kompaniyasini sudga berdi

Papa Johnʼs pitstseriyalar tarmog‘i asoschisi Jon Shnatter o‘z kompaniyasi ustidan Delaver shtati sudiga arz qildi, deb xabar berdi CNBC. Shnatter kompaniyadan uning Papa John's direktorlar kengashi raisi lavozimidan bo‘shatishga aloqador hujjatlarni taqdim etishni talab qilmoqda.

U direktorlar kengashini boshboshdoqlikda ayblamoqda. Papa Johnʼs asoschisining fikricha, kengashning mustaqil a'zolari yoki yetarlicha ma'lumotlarsiz harakat qilishgan yoki «to‘ntarishni avvaldan rejalashtirishgan».

«Kompaniya biznes bilan bog‘liq muammolarni hal qilish bilan shug‘ullanish o‘rniga aslida nima bo‘lganini ochib beruvchi faktlarni yashirmoqda. Ular o‘z muvaffaqiyatsizliklarini berkitish maqsadida janob Shnatterdan foydalanishgan», dedi uning advokati Petti Gleyzer.

Eslatib o‘tamiz, 56 yoshli Shnatter may oyida xodimlari bilan yopiq majlis o‘tkazgan chog‘ida AQShda qora tanlilar uchun haqorat deb qabul qilinadigan so‘zni ishlatgani OAVda tarqalganidan so‘ng tanqidlar ostida qolgandi. Biznesmen uzr so‘ragan va oxir-oqibat Papa John's direktorlar kengashi raisi lavozimini tark etgandi.