Yaqin yillarda maktablar qanchalik o‘zgaradi?

Qonun hujjatlari ta'sirini baholash tizimi portalida 2018–2021 yillarda O‘zbekiston xalq ta'limi tizimini tubdan takomillashtirish bo‘yicha «Yo‘l xaritasi» loyihasi muhokama qilinmoqda.

Ta'lim shart-sharoitlarini yaxshilashga yo‘naltirilgan chora-tadbirlar kompleksini amalga oshirish rejalashtirilmoqda. Maktablar filiallaridagi o‘quvchilar maktab avtobuslari tashkil etish yoki yangi maktablar qurish hisobiga asosiy maktablarga ko‘chiriladi. Nodavlat maktablar tarmog‘ining kengaytirilishi ham vazifani hal etishda yordam beradi, deb yozadi Norma.

Maktab hayotining barcha sohalariga AKTni joriy etishga yo‘naltirilgan dasturlar tasdiqlanadi. Ushbu vazifalarni hal etish maqsadida Ta'lim sohasidagi axborot-kommunikatsiya texnologiyalari agentligi tashkil etiladi. Boshqa innovatsiyalar qatori, bank tizimi va boshqa tizimlarga (tibbiyot va huquqni muhofaza qilish) integratsiyalash imkonini beradigan o‘quvchilarni identifikatsiyalash yagona tizimi va ularning maktabga qatnash hisobini yuritish tizimlarini (ID-karta, NFS belgisi va b.) joriy etish ko‘zlangan.  

Maktab direktorlarini saralab olish va tayinlash tartibi ham o‘zgartiriladi. Ta'lim menejyerlarini qayta tayyorlash kurslaridan majburiy ravishda o‘tib, sertifikat olishni nazarda tutadigan normalarni joriy etish ko‘zlanmoqda.

Xalq ta'limi muassasalari xodimlarining sha'ni va obro‘siga dog‘ tushiruvchi dalillar aniqlangan, Ta'lim vazirligining Nazorat-huquq xizmati xulosalari asosida o‘rganish natijalariga ko‘ra o‘quvchilarning o‘zlashtirishi sezilarli darajada pasayib ketgan hollarda xodim bilan tuzilgan mehnat shartnomasini muddatidan oldin bekor qilish tartibi nazarda tutilmoqda.

Yangi davlat ta'lim standartlari ishlab chiqilib, joriy etiladi. Ular ilg‘or xalqaro tajriba asosida, STEAM (fan, texnologiyalar, injyeneriya, madaniyat va matematika) hamda mamlakatning milliy xususiyatlari hisobga olingan holda ishlab chiqiladi.

Rus tilini o‘qitish sifatini oshirishga e'tibor qaratiladi. Rus tili va adabiyoti sohasida pedagog kadrlarni tayyorlash va qayta tayyorlash uchun respublikamizning har bir mintaqasida A.S.Pushkin nomidagi rus tili instituti filiallarini, shuningdek Rossiya oliy ta'lim muassasalarining O‘zbekistondagi filiallarini ochish masalasini ishlab chiqish taklif qilinmoqda.  

Maktab bitiruvchilarini kasb-hunarga tayyorlash tizimini takomillashtirish rejalashtirilgan. Kasb-hunar kollejlarining o‘quv-ishlab chiqarish komplekslari, shuningdek kasb-hunarga tayyorlash sifatini ta'minlovchi O‘rta maxsus, kasb-hunar ta'limi markazi muassasalari Xalq ta'limi vazirligi tasarrufiga o‘tkaziladi.
 
Maktab ta'limi maktabdan tashqari ta'lim bilan birgalikda rivojlantiriladi. Bazasida to‘garaklar ishlayotgan «Barkamol avlod» bolalar markazlari tarmog‘ini ham rivojlantiradilar. Maktab turizmi rivojlantiriladi. Buning uchun barcha mintaqalarda 100–150 o‘rinlik «Bolalar turistik bazalari» tashkil etiladi. Bolalar kutubxonalari (faoliyat yuritayotgan axborot-resurs markazlari) va maktab kutubxonalari faoliyatini takomillashtirish va moddiy-texnikaviy bazasini yaxshilash bo‘yicha kompleks chora-tadbirlarni amalga oshirish ko‘zlanmoqda.

Loyiha o‘zgartirilishi, unga qo‘shimcha kiritilishi yoki rad etilishi mumkin.