AQSh moliya vazirligi amerikalik pastor Endryu Branson ishi tufayli Turkiya adliya va ichki ishlar vazirlariga nisbatan sanksiyalar joriy etdi, deb xabar berdi Oq uy matbuot kotibi Sara Sanders.
Uning so‘zlariga ko‘ra, bu shaxslar pastorning hibsga olinishida yetakchi rolni o‘ynashgan.
Sanders vazirlarning AQSh yurisdiksiyasi ostidagi barcha hisobraqam va aktivlari muzlatib qo‘yilganini bildirdi.
Avvalroq OAV AQSh prezidenti Donald Tramp Isroildan XAMAS bilan aloqadorlikda ayblangan turkiyalik aktrisa Ebru Ozkanni ozod etishni talab qilgani haqida xabar bergandi. Tramp buning evaziga Turkiya amerikalik pastorni ozod qilishini kutgan. Natijada Isroil 15 iyulda Ozkanni deportatsiya qilgan, ammo Branson Turkiyada qolgandi.
Yakshanba kuni Turkiya prezidenti Erdo‘g‘an Qo‘shma Shtatlar Turkiyadek yaqin ittifoqchisini yo‘qotishi mumkinligini aytdi.
"Biz sanksiyalar tufayli ortga chekinmaymiz. Biz Branson masalasida savdolashmaganmiz", — degan Turkiya rahbari Haberturk nashrining yozishicha.
Erdo‘g‘an Anqara Vashingtondan Ebru Ozkanni Isroildan qaytarishda yordam so‘raganini, ammo Turkiya Bransonni AQShga qaytarishga va'da bermaganini bildirdi.
Amerikalik pastor FETÖ tashkiloti bilan aloqadorlikda hamda mamlakatda taqiqlangan Kurdiston ishchilar partiyasini qo‘llab-quvvatlashda ayblanib 2016 yil oktabrdan buyon Turkiyada ushlab turilibdi. Branson ayblovlarni rad etmoqda.
O‘tgan haftada Izmir sudi pastorni uy qamog‘ida saqlash hukmini chiqardi. Sudning 25 iyuldagi qaroriga ko‘ra Bransonga Turkiyani tark etish taqiqlandi. Branson ishi bo‘yicha navbatdagi tinglovlar 12 oktabrga belgilangan.
