1 avgust kuni xalq deputatlari Oqdaryo tumani kengashining ham navbatdan tashqari sessiyasi bo‘lib o‘tdi. Bu haqda Zarnews Samarqand viloyati hokimligiga asosan xabar bermoqda.
O‘zbekiston Respublikasi prezidentining Davlat maslahatchisi U.Ismoilov va viloyat hokimi vazifasini bajaruvchi E.Turdimov ishtirok etgan sessiyada tashkiliy masala ko‘rildi.
2016 yil noyabr oyidan buyon Oqdaryo tumani hokimi vazifasida ishlab kelgan Pirmatboy Turanovich O‘sarov o‘z arizasiga ko‘ra tuman hokimi vazifasidan ozod etildi.
Shu paytgacha «O‘zagrotexsanoatxolding» aksiyadorlik jamiyati investitsiyalarni jalb qilish, investitsion loyihalarni amalga oshirish va ishlab chiqarishni mahalliylashtirish boshqarmasi boshlig‘i vazifasida faoliyat ko‘rsatgan Feruz Ne'matullayevich Abilov Oqdaryo tumani hokimi vazifasini bajaruvchi etib tayinlandi.
Eslatib o‘tamiz, avvalroq Samarqand viloyatining ikki tumanida hokim o‘zgargani xabar qilingandi.
