O‘zbekiston Respublikasi Ichki ishlar vazirining maslahatchisi, general-polkovnik Zokir Almatov boshchiligidagi ishchi guruh Xorazm viloyatiga tashrif buyurdi, deb xabar bermoqda Xorazm viloyati IIB matbuot xizmati.
Ishchi guruh a'zolari dastlab Urganch shahridagi 4-sonli ichki ishlar bo‘limi faoliyati bilan tanishdilar. Eslatib o‘tamiz, ushbu ichki ishlar bo‘limi respublikamizda ilk marotaba huquqiy ekspriment tariqasida sektorlar kesimida tashkil etilgan ichki ishlar bo‘limlaridan biridir.
Shundan keyin Xorazm viloyati musiqali drama teatrida yig‘ilish va ijodiy uchrashuv bo‘lib o‘tdi. Unda Xorazm viloyati hokimi vazifasini bajaruvchi Farhod Ermanov, huquq-tartibot idoralari mas'ul xodimlari, jamoatchilik tashkilotlari vakillari va bir guruh ichki ishlar xodimlari ishtirok etishdi.
Yig‘ilishda so‘zga chiqqan vazir maslahatchisi, general-polkovnik Z.Almatov bugungi kunda amalga oshirilayotgan islohotlar mazmun-mohiyatiga to‘xtalar ekan, jinoyatchilik va huquqbuzarlikka qarshi kurashda huquq-tartibot organlari, jamoatchilik tashkilotlari va keng jamoatchilik hamkor, hamfikr bo‘lishi kerakligini alohida ta'kidlab o‘tib, hamkor tashkilotlarga minnatdorchilik bildirdi. Jinoyatchilikka qarshi kurashda faollik ko‘rsatgan bir guruh profilaktika inspektorlari, mahalla fuqarolar yig‘inlari raislari va mahalla posbonlariga qimmatbaho sovg‘alar topshirildi.
Shundan keyin, ishchi guruh Urganch shahrining “Kamolot” mahallasida 4 nafar profilaktika inspektori uchun barpo etilgan xizmat uylariga tashrif buyurib, u yerdagi sharoitlar bilan tanishdi. Qisqa muddatda, qurib foydalanishga topshirilgan ushbu xizmat uylari bugungi kunda profilaktika inspektorlarining ish samaradorligini oshirishda muhim o‘rin tutmoqda.
