Oqqo‘rg‘onlik «manyak» o‘z jinoyatlarini qo‘shnilaridan qasos olishi bilan izohladi

Toshkent viloyatining Oqqo‘rg‘on tumani, Xonobod mahallasida 3 bolani o‘ldirgan va umrbod qamoq jazosiga hukm qilingan Zohid Otaboyev o‘z jinoyatlarini qo‘shnilaridan o‘ch olgani bilan izohladi. Bu haqda Bosh prokuraturaning Facebook’dagi sahifasida ma'lum qilindi.

Mudhish jinoyat tafsilotlari 4 avgust kuni «O‘zbekiston 24» telekanalida ham namoyish etildi.

2010 yili 23 yoshda bo‘lgan Zohid Otaboyev hamqishloqlari bilan mahalliy to‘qimachilik fabrikasida ishlayotganda qo‘shnilari Abbos Otamirzayev, Shodiyor Aliboyev va Zufar Azimboyevning u qachon uylanishi haqidagi hazil aralash savollarini erkaklik g‘ururining toptalishi sifatida qabul qilgandi. U shundan so‘ng buning uchun o‘z jabrdiydalaridan o‘ch olish rejasini tuzadi va qo‘shnilarining farzandlarini o‘ldirishga qaror qiladi.

Uning birinchi qurboni Abbos Otamirzayevning 7 yoshli o‘g‘li bo‘ldi. 2010 yilning 12 iyunida Zohid ko‘chada o‘ynab yurgan Shahbozni aldab, uyiga olib kiradi va mushti bilan boshiga bir necha bor qattiq zarba berib yiqitadi. So‘ng bolani bo‘g‘ib, hojatxonaga tashlab yuboradi va ustidan tuproq bilan ko‘mib yuboradi.

2014 yil 10 avgustida esa u Shodiyor Aliboyevning 9 yoshli soqov o‘g‘li Yorqinbekni velosipedda ko‘chasidan o‘tayotganida, aldov yo‘li bilan uyiga olib kiradi. U bu bolani ham urib o‘ldirib, yangi o‘raga ko‘mib tashlaydi, velosipedni esa daryoga tashlab yuboradi.

Oradan 3 yil o‘tib, 2017 yilda Zohid Otaboyev uylanadi, biroq u «qasd olish»da davom etadi. O‘sha yili noyabr oyida uning tomorqasiga tasodifan Zufar Alimboyevning 3 yashar o‘g‘li Oybek kirib qoladi. Otaboyev bolani ketmon bilan urib jarohatlaydi va omborga olib o‘tib, bo‘g‘ib o‘ldiradi. Bolani izlab kelgan Oybekning onasiga hech kimni ko‘rmaganini aytadi va uni qaytarib yuborgach, jasadni chuqurga tashlaydi.

Oradan uch kun o‘tib jinoyatchi Bosh prokuraturaning o‘ta og‘ir jinoyatlarni tergov qilish boshqarmasi xodimlari tomonidan qo‘lga olinadi.