12:26 / 08.08.2018
4609
Пентагон раҳбари: «Коинот ҳарбий ҳаракатларнинг янги театрига айланди»
Фото: AFP/ Saul Loeb

АҚШ мудофаа вазири Жеймс Мэттис Америка қуролли кучлари ичида космик кучларга тезкор қўмондонликни ташкил этиш ғоясини қўллаб-қувватлади.

«Биз коинотга ҳарбий ҳаракатлар ривожланаётган театр, деб қарашимиз керак. Тезкор қўмондонликни ташкил этиш, албатта, вариантлардан бири саналади», - дея Пентагон раҳбарининг сўзларини келтиради ABC News.

Июнь ойида Трамп Пентагонга алоҳида турдаги қўшинлар - Ҳарбий-космик кучларни ташкил этиш ҳақида топшириқ берди. Бу коинотдаги Америка инфратузилмаси хавфсизлиги борасида ташвишлар пайдо бўлаётгани сабабли кузатилди.

Мэттиснинг сўзларига кўра, маҳкама ушбу ташаббусни тўлиқ қўллаб-қувватлайди ва ғояни амалга ошириш устида ишламоқда. Пентагон раҳбарининг таъкидлашича, коинот - «ер, ҳаво ва денгиз каби жанг майдонидир».

Америкалик космик объектларнинг заифлиги ҳақида аввалроқ НАСА директори Жим Брайденстайн ҳам айтганди. Унинг сўзларига кўра, GPS сигналининг йўқолиши АҚШга «ҳаёт фаолиятининг тўхташи» билан таҳдид қилади.

Ҳозирда АҚШ қуролли кучлари тузилмасида олтита географик (Африка, Европа, Тинч океани, Шимолий, Жанубий, Марказий) ва тўртта функционал (Стратегик, Транспорт, Киберқўмондонлик ва Махсус амалиётлар) қўмондонлиги мавжуд. 

Top