Afg‘oniston poytaxti Kobulga raketa zarbasi berildi. Bu haqda Tolo News telekanali xabar qilmoqda.
Zarba mahalliy vaqt bilan soat 9:00lar atrofida (Toshkent vaqti bilan 9:30) berilgan. Ta'kidlanishicha, hujum mamlakat prezidenti Ashraf G‘anining Qurbon Hayiti munosabati bilan chiqish qilayotgan vaqtida amalga oshirildi.
Telekanal ma'lumotlariga ko‘ra, raketalar prezident saroyi va shaharning hukumat kvartaliga qarata uchirilgan.
«Zo‘ravonlikni davom ettirayotgan va raketalarni uchirayotgan guruhlar bor, ular afg‘on xalqining rivojlanishini to‘xtata olmaydi», - deya ma'lum qildi G‘ani.
Eslatib o‘tamiz, avvalroq «Tolibon» harakati vakillari 4 sentabr kuni Moskvaga Afg‘onistondagi vaziyatni tinch yo‘l bilan hal qilish bo‘yicha xalqaro uchrashuvda ishtirok etish uchun kelishlari xabar berilgandi.
Maslahatlashuvlarda Rossiya bilan bir qatorda, Xitoy, Hindiston, Eron, Pokiston, Afg‘oniston, Tojikiston, O‘zbekiston, Turkmaniston, Qozog‘iston va Qirg‘iziston vakillari ham ishtirok etadi.
