Golden week: Bayram kunlari mehmonxonalarda 30 foizgacha chegirmalar e'lon qilinadi

Bayram kunlari sayohatchi guruhlar sonidan kelib chiqib, O‘zbekistondagi mehmonxonalarda 30 foizgacha chegirmalar e'lon qilinadi. Turizmni rivojlantirish davlat qo‘mitasi matbuot xizmati shu haqida xabar berdi. 

O‘zbekiston Respublikasi Prezidentining “Rasmiy sanalarni bayram qilish davrida qo‘shimcha dam olish kunlarini belgilash va 2018 yilda dam olish kunlarini ko‘chirish to‘g‘risida”gi farmoniga muvofiq qo‘shimcha dam olish kunlari belgilangan. 

Ushbu dam olish kunlarini mazmunli o‘tishini ta'minlash maqsadida Turizmni rivojlantirish davlat qo‘mitasi hududlardagi mehmonxonalar bilan birgalikda barcha xududlarda bayram kunlari sayohatchi guruhlar sonidan kelib chiqib, mehmonxonalarda 30 foizgacha chegirmalar e'lon qiladi. 

Prezident tomonidan Navro‘z bayrami, Mustaqillik, Yangi yil kabi bayramlarda yiliga besh kun to‘xtovsiz dam olish kunlari ("Golden week"- "Oltin hafta") joriy qilingan. Shu bois turli tashkilotlar xodimlariga Golden week yoki dam olish kunlarida O‘zbekiston bo‘ylab sayohat qilish tavsiya etildi. 

Ta'kidlash joizki, dam olish kunlarini uzaytirish bo‘yicha imzolagan farmon xalqda yurtning boy madaniy merosi, tarixi va urf-odatlarini yaqindan o‘rganishga, xalqning ma'rifiy darajasini o‘stirishga hamda vatanparvarlik, birdamlik hissini mustahkamlashga yanada ko‘proq xizmat qiladi.