Vazirlar Mahkamasining "Fransiyaga oliy darajadagi tashrif davomidagi madaniy-gumanitar tadbirlarga tayyorgarlik ko‘rish va ularni o‘tkazish chora-tadbirlari to‘g‘risida"gi qarori qabul qilindi.
Hujjatga ko‘ra, joriy yilning oktabr oyida O‘zbekiston Respublikasining prezidenti oliy darajadagi tashrif bilan Fransiyaga boradi. Qarorga muvofiq oliy darajadagi tashrifning madaniy-gumanitar qismiga tayyorgarlik ko‘rish bo‘yicha “Yo‘l xaritasi” tasdiqlandi.
Tashrifning ushbu qismiga tayyorgarlik doirasida Madaniyat vazirligiga, istisno tariqasida, tender (tanlov) savdolari o‘tkazmasdan, eng yaxshi takliflarni tanlab olish yo‘li bilan tovarlarni yetkazib beruvchilar, ishlarni bajaruvchilar va xizmatlarni ko‘rsatuvchilar bilan to‘g‘ridan-to‘g‘ri shartnomalar tuzishga ruxsat berildi.
Shuningdek, Madaniyat vazirligi huzurida Fransiya madaniyat markazi tashkil etiladi.
