Si Tszinpin va Donald Tramp Shavkat Mirziyoyevni tabrikladi

Xitoy Xalq Respublikasi raisi Si Tszinpin va Amerika Qo‘shma Shtatlari prezidenti Donald Tramp prezident Shavkat Mirziyoyevni tabrikladi. Bu haqda davlat rahbari matbuot xizmati xabar bermoqda.

“Xitoy Xalq Respublikasi hukumati va xalqi nomidan, shaxsan o‘z nomimdan Sizni va do‘st O‘zbekiston xalqini O‘zbekiston Respublikasi davlat mustaqilligining 27 yilligi munosabati bilan samimiy tabriklash va eng ezgu tilaklarni bildirishga ijozat bergaysiz.

Sizning rahbarligingizda O‘zbekistonda barqaror siyosiy muhit kuzatilmoqda, barcha yo‘nalishlarda jadal islohotlar amalga oshirilmoqda, iqtisodiy rivojlanish sur'atlari tobora ortib bormoqda, buning natijasida xalqning hayot darajasi muttasil oshmoqda, davlat qurilishi sohasida muvaffaqiyatlar qo‘lga kiritilib, mamlakatning jahon miqyosidagi obro‘-e'tibori yuksalmoqda. O‘zbekistonning yaxshi qo‘shnisi, ishonchli hamkori va yaqin do‘sti sifatida Xitoy tomoni bularning barchasidan g‘oyat mamnun bo‘lmoqda.

Men Xitoy-O‘zbekiston munosabatlarini rivojlantirishga katta e'tibor qaratib kelmoqdaman, Siz bilan o‘rtamizdagi samimiy ishchan munosabat va do‘stlikni yuksak qadrlayman. Shanxay hamkorlik tashkilotining yaqinda Tsindao shahrida bo‘lib o‘tgan sammiti doirasida biz samarali uchrashuv o‘tkazdik, qator muhim kelishuvlarga erishdik, ularning barchasi Xitoy va O‘zbekiston munosabatlari rivojiga yangi harakatlantiruvchi kuch bag‘ishladi. Xitoy-O‘zbekiston o‘rtasidagi har tomonlama strategik sheriklik munosabatlarini ikkala mamlakat xalqlari ravnaqi va farovonligi yo‘lida rivojlantirishda yangi natijalarga erishish uchun Siz bilan birgalikda sa'y-harakatlarimizni safarbar etishga tayyorman.

Do‘st O‘zbekistonga taraqqiyot va kuch-qudrat, xalqingizga baxt-saodat va farovonlik tilayman”, - deyiladi Si Tszinpinning maktubida.

“Sizni va O‘zbekiston xalqini katta mamnuniyat ila Mustaqillik kuni  bilan tabriklayman. Amerika Qo‘shma Shtatlari mamlakatingiz mustaqilligi, suvereniteti va hududiy yaxlitligining qat'iy tarafdori bo‘lib qoladi va biz mamlakatingiz mustaqilligining 27 yilligini erkin va jadal rivojlanayotgan davlat sifatida nishonlayotganingizdan xursandmiz.

O‘tgan 27 yil mobaynida bizning munosabatlarimiz izchil rivojlandi va shu yil may oyida Sizning Oq uyga tarixiy tashrifingiz uning yuksak bosqichi bo‘ldi. Men Siz bilan uchrashganimdan, mintaqadagi umumiy tahdidlarni hal qilish uchun strategik sherikligimizga yangi sur'at baxsh etish imkoniyatidan mamnun bo‘ldim. Shuningdek, Sizni siyosat, iqtisodiyot va inson huquqlari sohalarida amalga oshirayotgan, O‘zbekiston xalqining ravnaqi va farovonligi hamda tinch taraqqiyot orqali gullab-yashnashi uchun mustahkam poydevor bo‘lib xizmat qiladigan keng ko‘lamli islohotlaringiz bilan qutlayman.

1 sentabr ayyomida biz sheriklikda o‘tgan yillarimizga minnatdorlik bilan nazar tashlaymiz hamda istiqbolda yuzaga keladigan yangi imkoniyatlarni orziqib kutamiz. Amerika xalqi nomidan demokratik O‘zbekistonning barqaror gullab-yashnashi yo‘lida birgalikdagi ishlarimizni davom ettiramiz, deb Amerika Qo‘shma Shtatlarining bu boradagi samimiy tilaklarini bildiraman”, - deb yozadi Donald Tramp o‘z tabrigida.