​Shavkat Mirziyoyevning Fransiyaga tashrif muddati ma'lum bo‘ldi

O‘zbekiston Respublikasi Prezidenti Shavkat Mirziyoyev joriy yilning 9-10 oktabr kunlari Fransiya Respublikasiga tashrif buyuradi, deb xabar bermoqda Kun.uz muxbiri. 

Ma'lum qilinishicha, tashrifning rasmiy maqomi hali oshkor etilmagan, shuningdek, rejaga kiritilgan uchrashuvlar va kutilayotgan natijalar haqida rasmiy ma'lumot yo‘q. Shunga qaramay, oliy darajadagi rahbarlarning uchrashuviga qadar bir nechta ahamiyatli tadbirlar bo‘lib o‘tdi. 

Xususan,  O‘zbekiston Respublikasi Moliya vazirining birinchi o‘rinbosari Ahadbek Haydarovning Fransiya taraqqiyot agentligining (FTA) Osiyo yo‘nalishi bo‘yicha direktor o‘rinbosari Jan-Klod Pires boshchiligidagi delegatsiya a'zolari bilan uchrashuvi bo‘lib o‘tdi.

Bundan ko‘zlangan maqsad, albatta, O‘zbekiston Respublikasi hamda Fransiya Respublikasi o‘rtasidagi moliyaviy-iqtisodiy va sarmoyaviy aloqalarni mustahkamlash kelishuviga erishishdir. Shuningdek, uchrashuvda FTA tomonidan mamlakat chorvachilik sohasini rivojlantirish bo‘yicha loyihalarni moliyalashtirish, Toshkent shahrining isitish tizimini modernizatsiya qilish, quyosh fotoelektrik stansiyasining qurilishi va «Chorvoq» erkin turistik zonasini tashkil etish kabi masalalarni muhokama etilgani ma'lum qilindi. Shu o‘rinda agentlik O‘zbekistonga 150 mln yevro hajmida moliyaviy ko‘mak ko‘rsatishga tayyorligini bildirgan.

Yana bir ahamiyatli uchrashuv O‘zbekiston Respublikasi Bosh prokuraturasida bo‘lib o‘tdi.

Unda Fransiyaning O‘zbekistondagi favqulodda va muxtor elchisi Violen de Vilmor Bosh prokuror Otabek Murodov bilan uchrashdi. Frantsuz elchisi yangi tashkil etilgan Bosh prokuratura huzuridagi Oliy o‘quv kurslari Akademiyasida huquqni muhofaza qiluvchi tashkilotlar xodimlari uchun Fransiya davlatidan soha mutaxassislari, ekspertlarni jalb etgan holda birgalikdagi o‘quv mashg‘ulotlarini o‘tkazishga qiziqish bildirgan.

Shuningdek, ikki davlat o‘rtasida huquqiy sohada shartnomaviy-huquqiy hujjatlarni, shu jumladan ekstraditsiya va huquqiy yordam ko‘rsatish to‘g‘risidagi shartnomalar tuzish zaruriyati alohida ta'kidlandi.

Ana shunday uchrashuvlardan biri, O‘zbekiston Respublikasi Favqulodda vaziyatlar vazirligi Fuqaro muhofazasi institutida Fransiyaning Ichki ishlar vazirligi Fuqaro muhofazasi va favqulodda vaziyatlarni bartaraf etish Bosh direksiyasi ekspertlari ishtirokida seminar-trening o‘tkazildi.

Maqsad – aholi xavfsizligini ta'minlash va favqulodda vaziyatlar oqibatlarini bartaraf etish bo‘yicha o‘zaro tajriba almashishdan iborat.Ishtirokchilar Fransiyaning favqulodda vaziyatlarni oldini olish va oqibatlarini bartaraf etish tizimi, ko‘ngilli va professional qutqaruvchilarni favqulodda vaziyatlarga tayyorlash, shuningdek, favqulodda vaziyatlarda harakat qilish uslublari bilan yaqindan tanishgan.

Shundan so‘ng, uchrashuvlar fransuzlar tomonda davom etdi: Bosh vazir o‘rinbosari Aziz Abduhakimov  O‘zbekiston delegatsiyasining Fransiyaga tashrifi doirasida "Frantsuz Alyansi"ning Markaziy Osiyodagi ishlari bo‘yicha mintaqaviy direktori Mikael Fuente bilan uchrashdi. Muzokaralar davomida umumiy o‘rta, o‘rta maxsus va professional ta'lim sohasidagi loyihalarni birgalikda amalga oshirish masalalari muhokama qilindi.

Oliy Majlis Senat raisi birinchi o‘rinbosari Sodiq Safoyev boshchiligidagi O‘zbekiston delegatsiyasi Fransiyaga tashrifi davomida Thales Alenia Space kompaniyasi vitse-prezidenti E.Imbert bilan uchrashib, kosmik sohani tadqiq etishda hamkorlik qilish bo‘yicha kelishuvga erishgan. Ta'limdagi hamkorlik bo‘yicha yana bir narsa: Parij Akademiyasi rektori, Il-de-Frans Akademik mintaqasi vaziri J.Peko Toshkentda fransuz oliy ta'lim muassasalaridan biri ochilishini bildirgan. 

Eng asosiysi Fransiya O‘zbekistonning energetika siyosatini qo‘llab-quvvatlab, atom energetikasining rivojiga ko‘maklashmoqchiligini bildirmoqda.

2017 yil sentabr oyida Fransiya Prezidenti Emmanyuel Makron Shavkat Mirziyoyevni Mustaqillik bayrami bilan qutlab, O‘zbekiston Prezidentini Parijga taklif qilgandi.

Ikki davlat o‘rtasidagi eng tarixda bor-yo‘g‘i uch marta davlat rahbarlarining tashriflari kuzatilgan. Ilk bor O‘zbekiston sobiq rahbari Islom Karimov 1993 yilda, keyinroq 1996 yilda Fransiyaga tashrif buyurgandi. O‘sha paytdagi Fransiya Prezidenti Fransua Mitteran esa 1994 yili davlat tashrifi bilan O‘zbekistonga kelgan. 

Fransiya O‘zbekistonning Yevropa mintaqasi bo‘yicha muhim iqtisodiy hamkorlaridan biri hisoblanadi. 2017 yil yakuniga ko‘ra, ikki davlat o‘rtasidagi tovar aylanmasi qiymati 251 million dollardan oshgan.