Mavsumdagi ilk «el-klasiko» sanasi tasdiqlandi

Ispaniya La Ligasi 10-turdan o‘rin olgan «Barselona» - «Real» uchrashuvining vaqti va sanasini tasdiqladi.

Liga prezidenti Xaver Tebasning Onda Cero radiosi efirida ma'lum qilishicha, mavsumdagi ilk el-klasiko 28 oktabr kuni mahalliy vaqt bilan soat 16:15 ga (Toshkent vaqti bilan soat 20:15) belgilangan.

Ikkinchi davrada ushbu jamoalar 26-tur doirasida Madridda uchrashishadi. Bu o‘yin hozircha 2019 yil 3 martida bo‘lib o‘tishi rejalashtirilgan.

Ushbu ikki klubning rasmiy doiralardagi o‘zaro o‘yinlari statistikasiga ko‘ra, oktabr so‘nggidagi bahs 272-klasiko bo‘ladi. Hozirga qadar 112 o‘yinda Kataloniya klubi g‘alaba qozongan bo‘lsa, 99 ta bahsda Madrid grandining qo‘li baland kelgan. Yana 60 uchrashuvda kuchlar teng kelgan. Gollar nisbati – 472-445, «Barsa» foydasiga.

Eslatib o‘tamiz, ispan grandlarining oxirgi uchrashuvi shu yilning may oyida bo‘lib o‘tgan va unda 2:2 hisobi qayd etilgan edi.