14-16 sentabr kunlari davomida Ispaniya chempionatida 4-tur uchrashuvlari o‘tkazildi.
«Real Sosedad» «Barselona»ga yana jiddiy qarshilik ko‘rsatdi, ammo yutqazdi.
«Real Sosedad» - «Barselona» - 1:2 (1:0)
Gollar: Elustondo, 12 (1:0). Suares, 63 (1:1). Dembele, 66 (1:2).
«Real Sosedad» (San-Sebastyan): Ruli, Saldua, Elustondo, Moreno, Ernandez, Ilyarramendi (Merino, 82), Subeldiya, Surutusa (Bautista, 73), Pardo (Sangali, 82), Oyarsabal, Xuanmi.
«Barselona»: ter Shtegen, Semedu (Koutinyu, 46), Pike, Yumtiti, Jordi Alba, Rakitich, Serxi Roberto, Rafinya (Buskets, 57), Messi, Suares, Dembele (Vidal, 77).
Ogohlantirishlar: Ilyarramendi, 43. Yumtiti, 87.
Kuz romansi
San-Sebastyan – Ispaniya shimolidagi go‘zal shaharlardan biri bo‘lib, bu shahar Biskay ko‘rfazi qirg‘oqlariga yashiringan. Bu esa hududda beqaror iqlim bo‘lishini ta'minlaydi – shamollar, yomg‘irlar, ayniqsa qishki vaqtda. «Barselona» oxirgi yillar basklarga qarshi safar o‘yinlarini yanvar oyida o‘tkazgan, sentabr oyida - ochiq osmon ostida «Real Sosedad» maydonidagi o‘yin ancha vaqtdan buyon kuzatilmagandi.
Eski tavqi la'nat
«Anoeta» - basklarning uy stadioni ko‘p yillardan buyon «Barselona» uchun qo‘rquv manzili bo‘lib kelgan, bu stadion katalonlar uchun la'natlangan stadionga aylangandi. Katalonlarning bu yerdagi oxirgi ikki g‘alabasi o‘rtasidagi muddat 11 yilni tashkil etardi - 2007 yilda 2:0 hisobidagi g‘alabadan keyin faqat shu yil yanvariga kelibgina 4:2 hisobidagi g‘alaba qayd etildi. 11 yil davomida jamoalar La Liga doirasida 7 uchrashuv o‘tkazgan («Real Sosedad» ma'lum muddat quyi divizionda ishtirok etdi) va bu uchrashuvlarda katalonlar 5 marta mag‘lub bo‘lib, 2 durang qayd etishgan.
San-Sebastyanda Pep Gvardiola ham, Tito Vilanova ham, Tata Martinov va Luis Enrike ham mag‘lub bo‘lgan. Bu yerdan Messi, Xavi, Neymar va Aleksis Sanches kabi yulduzlar gol ura olmasdan ketishgan. «Biskay uchburchagi»da katalonlar kemasi qayta va qayta cho‘kkan, faqat 2018 yilning yanvarida Ernesto Valverde muvaffaqiyat qozona oldi. O‘shanda ham mezbonlar avvaliga 2:0 hisobida oldinga chiqib olishgan va katalonlar iroda ko‘rsatib, tarixiy g‘alabaga erishgandi.
Yangi «Anoeta»
O‘tgan yilning oktabrida basklar stadionni yangilashga kirishdi. Asosiy vazifa - «Anoeta»ni haqiqiy futbol stadioniga aylantirish edi, yugurish yo‘laklari olib tashlandi va qo‘shimcha qavatlar o‘rnatilib, stadion sig‘imi 32 mingdan 42 ming kishiga yetkazildi.
Qurilish ishlariga 47 million yevrolik byudjyet ajratildi. Stadion tayyor bo‘lgunicha, bu mavsumning ilk 3 turini «Real Sosedad» safarda o‘tkazdi.
«Barsa» uchun halokatli bo‘lim
O‘yinda hisobni mezbonlar himoyachisi Elustondo ochdi. Standart vaziyatdan keyin darvoza ustunidan qaytgan to‘pga ega chiqqan futbolchi Ter Shtegenni ojiz qoldirdi.
Qatorasiga oltinchi mavsum katalonlar «Anoeta»da birinchi bo‘lib gol o‘tkazmoqda. Valverde terma jamoa o‘yinlaridan qaytgan Buskets va Koutinoni tushirmadi, Rafinya asosiy tarkibdan joy oldi. Ammo bu o‘zini oqlamadi, birinchi bo‘lim «Barselona» uchun juda yomon kechdi, birorta ham xavfli vaziyat yaratilmadi, jamoa bu yerga ochko olish uchun kelgandek ko‘rinmadi.
Ikkinchi bo‘limdagi burilish
Ammo kataloniyaliklar murabbiyi o‘yinda o‘zgarish yasay oldi. U ikkinchi bo‘lim boshidayoq Buskets va Koutinoni maydonga tashladi va «Barselona» o‘yini butunlay o‘zgardi. O‘sha-o‘sha sxema ishga tushdi, o‘yinda mazmun paydo bo‘ldi, tezlik oshdi. Atigi 3 daqiqada 2ta samarali hujum uyushtirilib, Suares va Dembele «Real Sosedad» himoyasi hamda darvozabon Rulini jazoladi.
Maydon egalari mag‘lubiyatdan qutulib qolishlari mumkin edi. Ammo Ter Shtegen kamida 3 marta jamoasini muqarrar gollardan qutqardi. «Barsa» himoyasida ko‘plab xatolar bo‘ldi, ammo «Real Sosedad» raqib xatolaridan foydalana olmadi.
Turnir favoritlaridan biri Bilbaoda ochko yo‘qotdi. Bunga basklar yangi darvozabonining fantastik harakatlari sabab.
«Atletik» - «Real» - 1:1 (1:0)
Gollar: Iker Muniain, 32 (1:0). Isko, 63 (1:1).
«Atletik» (Bilbao): Simon, De Markos, Alvares, Inigo Martines, Berchiche, Raul Garsiya, Dani Garsiya, Echevarria (Mikel Riko, 81), Susaeta, Inyaki Uilyams (San-Xose, 76), Iker Muniain (Kapa, 54).
«Real» (Madrid): Kurtua, Karvaxal, Serxio Ramos, Varan, Marselu, Sebalos (Kazemiru, 46), Kroos, Modrich (Isko, 61), Beyl (Vaskes, 75), Benzema, Asensio.
Ogohlantirishlar: Alvares, 45. Dani Garsiya, 60. Kapa, 68. Berchiche, 72. Echevarria, 78. Karvaxal, 85. Vaskes, 87. Simon, 90+2.
Basklar yurtidagi imtihon
Ispan futbol tojiga da'vogar ikki jamoa - «Barselona» va «Real» 4-turda basklar o‘lkasida jiddiy imtihondan o‘tishdi. Katalonlar qiyinchilik bilan bo‘lsa-da g‘alabaga erishdi, ammo madridliklar «San Mames»da g‘alaba qozona olishmadi va asosiy raqobatchini oldinga o‘tkazib yuborishdi.
Sherlar yuragi
«Atletik»ning ikkinchi nomi «Sherlar». Bu jamoa safar o‘yinlarida qanchalik yomon o‘ynasa-da, o‘z uyida hech kimga taslim bo‘lishni istamaydi. Katta jamoalar hamisha bu yerda katta qiyinchiliklarga duch kelishgan. La Liga doirasida Bilbaodagi oxirgi 5 uchrashuvda «Real» bu yerdan 15 o‘rniga 8 ochko bilan qaytgan.
Umidli Simon
Faqat shu yil avgustida o‘rinbosarlar tarkibidan asosiy jamoaga o‘tkazilgan 21 yoshli Unai Simon 90 daqiqa ichida barchani Kepa Arrisabalagani unutishga majbur qila oldi. Kepa 80 million yevro evaziga «Chelsi»ga yo‘l olganida ko‘pchilik basklar endi u darajadagi darvozabon topa olishiga ishonqiramay qaragandi. Ammo shanba oqshomidagi o‘yinda Simon oyoqlari bilan ham, qo‘llari bilan ham «Real»ning kamida 5ta golini yo‘qqa chiqardi.
Munianning goli
Mehmonlar o‘yinning dastlabki daqiqalaridanoq hujumda harakat qildi, «Atletik» o‘z vaqtini kutdi. Simonning qahramonliklaridan keyin, birinchi bo‘limning ikkinchi qismida nihoyat Kurtua darvozasi tomon ham xavf solina boshlandi. Uilyams va Munian juftligi raqib jarima maydonidagi pala-partishlikdan foydalanib hisobni ochishdi.
Iskoning javobi
Madridliklar uzoq vaqt javob qaytara olishmadi, bunga Simon to‘sqinlik qildi. U Beylning jarimadan bergan zarbasini, qaytgan to‘pga yetib kelgan Ramosning zarbasini qaytarishi munosib olqishlar bilan qarshilandi. «Qirollik klubi» to‘xtovsiz hujumlar uyushtirib, zarbalar berar, yosh darvozabon o‘zini ko‘rsatardi. Faqat bir marta, zaxiradan o‘yinga qo‘shilgan Iskoning bosh bilan uzoq burchakka yo‘llagan zarbasini u to‘sib qololmadi.
Ammo u keyin ham gol o‘tkazmadi. Final hushtagi chalinishi arafasida asablar jangi boshlandi va hakam cho‘ntagidan ketma-ket sariq kartochkalar chiqa boshladi. «Atletik» jarohat tufayli Munianni yo‘qotgandan keyin ham hujum qilishni to‘xtatmadi hamda durang hisobni ushlab qoldi.
Bilbaoda yangi darvozabon porlamoqda. Madrid ilk marta ochko yo‘qotdi. Endi «Barselona» bilan oradagi farq 2tani tashkil qilmoqda.
«Atletiko»da inqiroz
«Atletiko» – «Eybar» – 1:1 (Borxa Garses, 90+4 – Serxi Enrich, 87)
«Atletiko» – Oblak, Godin, Xuanfran, Ximenes, Filipe Luis, Rodri Ernandes (Garses, 71), Lemar (Korrea, 59), Koke, Saul, Grizmann, Diyego Kosta.
«Eybar» – Dmitrovich, Paulu Oliveyra, Arbilya, Xose Anxel, Penya, Alvares, Jordan, Diop (Kardona, 80), De Blasis, Milya (Eskalante, 57), Sharles (Enrik, 57).
Ogohlantirishlar: Sharles (16), Koke (39), Godin (51), Diop (54).
Diyego Simeone jamoasi mavsumni yaxshi boshlamadi, birinchi turda «Valensiya» bilan durang (1:1), 2-turda kamtar «Rayo Valekano» ustidan kamtar hisobdagi g‘alaba (1:0), uchinchi turda esa «Selta»ga uchralgan mag‘lubiyat (0:2).
Endi jamoa «Vanda Metropolitano»da o‘z muxlislari qarshisida o‘zini oqlab olishi mumkin edi. Ammo «Eybar» bunga yo‘l qo‘ymadi. «Atletiko» ko‘p sonli hujumlarini gol bilan yakunlay olmadi, Diyego Kosta ham, Antuan Grizmann ham yakkama-yakka vaziyatlarni yo‘qqa chiqardi. Shundan so‘ng mehmonlar hujumga o‘ta boshlashdi, ikki marta Oblak joniga darvoza ustunlari oro kirdi. 87-daqiqada Serxi Enrich Godinning xatosidan keyin gol urib, mezbonlarni halokat yoqasiga keltirib qo‘ydi. Ammo o‘yinga zaxiradan qo‘shilgan, 19 yoshli Borxi Garses qo‘shib berilgan 4-daqiqada gol urib, La Ligadagi debyutidayoq jamoani qutqardi.
Endi uni Fernando Torresga qiyoslay boshlashdi. U madridliklar jamoasining yangi stadionidagi 50-goli muallifi sifatida tarixga kirdi.
«Valensiya» inqirozi
«Valensiya» – «Betis» 0:0 (0:0, 0:0)
«Valensiya» – Domenek, Pichchini, Gabriel, Diakabi, Gayya, Ferran Torres (Gonsalu Gedesh, 63), Parexo, Kondogbia (Vass, 14), Cherishev (Batshuayi, 77), Gameyro, Rodrigo.
«Betis» – Lopes, Mandi, Bartra, Sidney, Gerrero, Kanales, Guardado, Firpo, Budebuz (Lo Chelso, 77), Inui (Sanches, 63), Sanabriya (Leon, 68).
Ogohlantirishlar: Ferran Torres (16), Parexo (31), Sanabriya (36), Pichchini (62), Gabriel (74), Diakabi (76), Guardado (77), Lopes (81), Batshuayi (90).
O‘tgan mavsumda kuchlilar qatorida borgan va mavsumni kuchli to‘rtlikda yakunlagan «Valensiya»da bu mavsum kutilganidek pasayish kuzatildi. Chunki jamoa o‘tgan mavsumdagi asosiy yetakchilarini tarkibda saqlab qololmadi. Lekin jamoa bu qadar pastga sho‘ng‘ishi kutilmagandi, ayni vaqtda valensiyaliklar 4 o‘yinda 1 mag‘lubiyat va 3 durang qayd etgan holda 3 ochko bilan 17-o‘rinda joylashgan.
Bu haftada «Valensiya» ham, «Betis» ham yevrokuboklardagi ishtirokini boshlaydi. «Valensiya» Chempionlar ligasida, «Betis» Yevropa Ligasida guruhdagi ilk o‘yinlarda maydonga tushadi. «Betis»ga qarshi o‘yin «Valensiya»da muammolar borligini ko‘rsatib qo‘ydi va jamoada «Yuventus», «Manchester Yunayted» hamda «Yang Boyz» klublari orasida keyingi bosqichga chiqish imkoniyati juda past.
«Sevilya» bu turda o‘z maydonida «Xetafe»ga yutqazdi (0:2) va turnir jadvalida 4 ochko bilan 11-o‘ringa joylashgan. «Espanol» «Levante»ni mag‘lub etib, kutilmaganda 7 ochko bilan to‘rtinchi o‘ringa ko‘tarilgan.
Bugun tur doirasidagi oxirgi o‘yin «Jirona» va «Selta» klublari o‘rtasida bo‘lib o‘tadi.
Tur o‘yinlari
«Ueska» – «Rayo Valekano» 0:1 (0:1, 0:0)
Gol: 0:1 – 29 Imbula.
«Leganes» – «Vilyarreal» 0:1 (0:0, 0:1)
Gol: 0:1 – 65 Bakka.
«Espanol» – «Levante» 1:0 (0:0, 1:0)
Gol: 1:0 – 52 Garsiya.
«Valyadolid» – «Alaves» 0:1 (0:0, 0:1)
Gol: 0:1 – 90 Ibai Gomes.
«Sevilya» – «Xetafe» 0:2 (0:2, 0:0)
Gollar: 0:1 – 3 Anxel, 0:2 – 38 Anxel.
Turnir jadvali
