Venetsiyada sayyohlarga yangi jarimalar joriy etiladi

Venetsiya hukumati sayyohlar uchun yangi cheklovlarni o‘ylab topdi. Endi shahar mehmonlari yerga o‘tirsa yoki yotsa 500 yevrogacha jarima to‘laydi, deb xabar berdi ATOR.

Venetsiya meri Luiji Brugnaro yerga o‘tirmoqchi yoki yotmoqchi bo‘lganlarni 50dan 500 yevrogacha jarimaga tortish kerak deb hisoblamoqda.

Bu taklif bo‘yicha shahar kengashida ovoz berish oktabr oyida bo‘lib o‘tadi. Bundan tashqari, qayiq va boshqa suv transportlarida musiqa qo‘yish ham taqiqlanishi mumkin: merning fikricha, bu shahar aholisining ishlashi va dam olishiga xalaqit beradi.
Venetsiyada shahar markazida yangi mehmonxona qurish, kirish eshiklari oldiga keluvchilar sonini hisoblaydigan turniketlar o‘rnatish, San-Marko maydoni, Yangi Prokuratsiya, Ala Napoleonika va Yakopo Sansovino kutubxonasi zinalarida, dei Leonchini maydonida maxsus ajratilgan joylardan boshqa joyda o‘tirish taqiqlangan.

Bundan tashqari, maxsus ovqatlanish muasssalaridan boshqa joylarda ovqatlanish yoki ichimlik ichish, qog‘oz, shisha va tunuka idishlar tashlash, jamoat joylarida piknik uyushtirish, kaptarlarga don berish, shahar markazida velosipedda sayr qilish, cho‘milish kiyimida yurish, ochiq osmon ostida uxlash mumkin emas.

Mahalliy aholidan tashkil topgan Gruppo Aprile 25 guruhi boshlig‘i Marko Gasparinettining aytishicha, barcha taqiqlarga rioya qilinishini nazorat qilish uchun meriyaga kamida 5 ming nafar politsiyachi yoki ko‘ngillilar kerak bo‘ladi.