Andijon viloyatida 4ta qo‘shimcha KSZ tashkil etilmoqda

Vazirlar Mahkamasining 18.09.2018 yildagi 741-son qarori bilan Andijon viloyatidagi bo‘sh turgan obektlar negizida 4 ta qo‘shimcha kichik sanoat zonalari tashkil etilmoqda.
 
Eslatib o‘tamiz, o‘tgan yil avgust oyidagi Hukumat qarori bilan Andijon viloyatida 4 ta KSZ tashkil etish nazarda tutilgan edi. Biroq ularning 2 tasi faoliyat yuritmaydigan ko‘rinadi (VMning 4.08.2017 yildagi 588-qaroriga 2-ilovadan 3, 4-pozitsiyalar chiqarib tashlandi).
 
Norma’ning yozishicha, mintaqada Andijon (1,1 ga), Shahrixon (30 ga), Qo‘rg‘ontepa (0,8 ga) va Baliqchi tuman KSZlar (4,8 ga) qo‘shimcha ravishda tashkil etiladi. Dastlabki uchtasiga hokimlikning zaxira fondidagi foydalanilmayotgan yer uchastkalari ajratiladi, so‘nggisi esa 1 000 m2 umumiy maydonga ega sobiq ferma bino va inshootlarini egallaydi. Aniq chegaralar bir oy muddatda belgilanadi.
 
KSZ hududidagi davlat ko‘chmas mulki biznesga 10 yil muddat bilan uzoq muddatli ijaraga, biznes-rejalar bajarilgan, ish o‘rinlari tashkil etilgan va saqlab qolingan, barcha soliqlar va majburiy to‘lovlar o‘z vaqtida to‘langan taqdirda keyinchalik ularga mulk huquqi beriladi. Ijaraga berilgan davrda (faoliyat turidan kelib chiqqan holda) oshib boradigan koeffitsiyentlarni qo‘llamasdan minimal stavkalar amal qiladi. Qatnashchilarga Andijon viloyati EIZ va KSZ ma'muriy kengashining (25.10.2017 yildagi PQ–3356-son qarorga muvofiq tashkil etilgan) qarorlari bilan yer beriladi.
 
Faoliyat ko‘rsatayotgan va yangidan tashkil etilayotgan KSZlarda umumiy qiymati 300 mlrd so‘m bo‘lgan ishlab chiqarishlarni yo‘lga qo‘yish rejalashtirilmoqda. Importning o‘rnini bosadigan va eksportga yo‘naltirilgan tayyor mahsulotlar, materiallar va butlovchi buyumlar ishlab chiqariladi. 2 oy muddatda aniq «yo‘l xaritalari» ishlab chiqiladi va 2018–2019 yillarda aynan qanday loyihalarni amalga oshirish ko‘zlanganligi tadbirkorlarga yetkaziladi. Bo‘lg‘usi investorlarga har tomonlama, sh.j. KSZ hududidagi loyihalarning biznes-rejalarini ishlab chiqishda ko‘mak beriladi.
 
Hujjat 20.09.2018 yildan kuchga kirdi.