Kanada Aun San Su Chjini faxriy fuqaro maqomidan mahrum qildi

Kanada parlamenti seshanba kuni Myanmadagi rohingya musulmonlariga qarshi sodir etilgan qirg‘inda ishtirok etganligi sababli Aun San Su Chjini Kanada faxriy fuqarosi maqomidan mahrum qildi. Bu haqda Associated Press xabar bermoqda.

Mamlakat parlamenti Myanma rahbariga 2007 yilda berilgan ramziy maqomdan mahrum etish haqidagi qarorni bir ovozdan ma'qulladi. Yuqori palataning qarori o‘tgan haftada umumiy palatada bir ovoz bilan qabul qilingan qarorni tasdiqladi.

Aun San Su Chji Kanada faxriy fuqaroligidan mahrum etilgan birinchi shaxsga aylandi.

O‘tgan oy Birlashgan Millatlar Tashkilotining dalillarni aniqlash bo‘yicha missiyasi Myanma harbiylari minglab rohingya musulmonlarini o‘ldirgani, yuzlab qishloqlarni yoqib yuborgani va etnik tozalash hamda ommaviy zo‘rlash bilan shug‘ullangani haqida xabar berdi. Missiya yuqori lavozimli harbiylarni jinoiy javobgarlikka tortish va genotsidni tergov qilish talabi bilan chiqdi.

Ma'lumot uchun: Aun San Su Chji - birmalik va myanmalik siyosiy arbob, harbiy xuntaga muxolif bo‘lgan «Demokratiya uchun milliy liga» partiyasi yetakchisi. 2016 yildan beri - Myanma tashqi ishlar vaziri va davlat maslahatchisi (bu lavozim bosh vazirlikka tengdir). Aun San Su Chjiga 1991 yilda Nobel tinchlik mukofoti berilgandi.

Eslatib o‘tamiz, avvalroq Reuters jurnalistlari Myanmadagi hodisalarni yoritganidan so‘ng 7 yilga ozodlikdan mahrum etilgani xabar qilingandi.