KXDR termasi bosh murabbiyi: «Osiyo kubogida chorak finalga chiqishni maqsad qilganmiz»

KXDR – O‘zbekiston o‘rtoqlik uchrashuvi oldidan tashkil etilgan matbuot anjumanining ikkinchi qismida mehmonlar murabbiyi Kim Yong Jun va hujumchi Jong Il Gvan ishtirok etdi.

«Ertangi bahs Osiyo kubogiga tayyorgarlik doirasidagi ilk o‘yin bo‘ladi. Terma jamoamiz bu yil hisobidan faqat bitta uchrashuv o‘tkazdi – mart oyida Osiyo chempionati saralashi o‘yinida Hongkongga qarshi maydonga tushgan edik.

Yil davomida kam o‘yin o‘tkazganimizning sababi – futbolchilar o‘z klublarida ham xalqaro darajada yetarlicha o‘yin amaliyotiga ega bo‘lishyapti. Klublarimiz OFK kubogida ishtirok etishdi. Qolaversa, noyabr oyida bo‘lib o‘tadigan Sharqiy Osiyo kubogi ham bor. 

Raqibni imkon qadar o‘rganishga harakat qildik. O‘zbekiston termasining FIFA reytingidagi o‘rni bizdan ancha yuqori. Bu jamoa bilan oxirgi ikki o‘yinimiz Jahon chempionati saralashi doirasida bo‘lgan edi. O‘shanda o‘z maydonimizda g‘alaba qozonib, Toshkentda mag‘lubiyatga uchragan edik.

Natijani muhim emas, deya olmayman. Chunki u jamoa ruhiyatiga ta'sir ko‘rsatadi. Ertangi g‘alaba Osiyo kubogini yaxshi kayfiyatda boshlashimizga yordam berishi mumkin.

Osiyo chempionatida qit'amizning eng kuchli jamoalari qatnashadi. Biz o‘z imkoniyatimizni chamalagan holda chorak finalga chiqishni o‘z oldimizga maqsad qilib qo‘yganmiz», - deya fikr bildirdi Kim Yong Jun.

KXDR terma jamoasi tarixidagi eng yaxshi to‘purar, Shveytsariya Superligasining «Lyutsern» klubi a'zosi Jong Il Gvan o‘yin oldi fikrlari va qanday qilib Yevropa klubiga o‘tishni uddalagani haqida gapirib o‘tdi.

«Jamoamiz nomidan shuni ta'kidlay olamanki, oldindagi bahsda biz yakdil jamoa sifatida imkon qadar yaxshi o‘yin ko‘rsatishga harakat qilamiz.

Shveytsariya klubiga yo‘l olishim terma jamoada ko‘rsatgan o‘yinlarim bilan bog‘liq. Men turli yoshdagi termalarda to‘p surib keldim. O‘tgan yili dekabrda Yaponiyada bo‘lib o‘tgan Sharqiy Osiyo chempionatida uchta gol kiritganimdan so‘ng bu klubdan taklif oldim. Menimcha, shveysariyaliklar shu o‘yindan keyin menga qiziqib qolishgan», - deya ta'kidladi Jong Il Gvan.

Ma'lumot uchun, 25 yoshli ushbu hujumchi 2010 yilda OFK tomonidan Osiyoda yilning eng yaxshi yosh futbolchisi deya e'tirof etilgan. U Sharqiy Osiyo chempionatining saralash va final bosqichlarida 3 ta gol urgan. Xususan, KXDRning so‘nggi o‘yini – mart oyidagi Hongkongga qarshi bahsda jamoasining yagona goliga mualliflik qilgan edi. Umuman, uning terma jamoadagi gollari soni 18 tani tashkil etadi.

Eslatib o‘tamiz, JCh-2018 saralashining ikkinchi bosqichida Shimoliy Koreya va O‘zbekiston terma jamoalari bir guruhdan o‘rin olgan edi. 2015 yil iyun oyida koreyslar maydoniga safar qilgan O‘zbekiston 2:4 hisobida mag‘lubiyatga uchragan, o‘sha yilning noyabrida Toshkentda o‘tgan javob bahsida mezbonlar 3:1 hisobida g‘olib chiqqan edi. Dastlabki o‘yinda KXDR 4-daqiqada, Toshkentda bahsda esa 2-daqiqadayoq hisobni ochishga muvaffaq bo‘lgan.

Yakunda O‘zbekiston guruh yetakchisi sifatida BAA-2019 yo‘llanmasini qo‘lga kiritgan, Shimoliy Koreya esa ikkinchi o‘rin bilan saralashning uchinchi raundiga yo‘l olgan edi. Qo‘shimcha saralashdan so‘ng jamoa Osiyo kubogi yo‘llanmasini qo‘lga kiritgan. 

Mahalliy murabbiy Kim Yong Yun jamoasi kelasi yil boshida bo‘lib o‘tadigan qit'a chempionatida Saudiya Arabistoni, Qatar va Livan termalari bilan bir guruhdan o‘rin olgan.

Qo‘shimcha qilish joiz, KXDR FIFA reytingida 109-o‘rinda bormoqda. O‘zbekiston terma jamoasi esa 96-o‘rinda qayd etilgan.