Farg‘onada ikki hokim bir kunda ishdan ketdi. Ularning o‘rniga yangi rahbarlar tayinlandi

15 oktabr kuni Farg‘ona viloyati Shuhrat G‘aniyev rahbarligida viloyat faollari ishtirokida o‘tkazilgan yig‘ilishda ikki hokim ishdan olingan.

«Kun.uz» manbasi xabar berishicha, Farg‘ona shahri hokimi Shavkat Shokirovich Erkaboyev hamda Farg‘ona tumani hokimi Sodiqjon Qodirovich Imomaliyev lavozimidan ozod etilgan.

Shavkat Erkaboyev 2016 yilning 1 dekabridan buyon Farg‘ona shahri hokimi sifatida ishlab kelayotgandi, undan oldinroq 2012 yildan 2016 yilgacha Marg‘ilon shahrini boshqargan.

Sodiqjon Imomaliyev esa ko‘p yillardan buyon Farg‘ona tumani hokimi lavozimida edi.

Manbaning ma'lum qilishicha, Shavkat Erkaboyev shahardagi qurilish ishlarida yo‘l qo‘ygan kamchiliklari hamda 2018 yilgi paxta mavsumidagi sustkashligi uchun ishdan olingan. Sodiqjon Imomaliyevning ishdan ketishi ham qishloq xo‘jaligi ishlariga sustkashlik bilan yondashgani, xususan, paxta terimiga yetarli miqdorda terimchi jalb eta olmagani tufaylidir.

16 oktabr kuni Farg‘ona shahriga Ravshan Rahimjonov yangi rahbar (v.b) etib tayinlangan. U shu vaqtgacha kommunal xizmat ko‘rsatish sohasida faoliyat ko‘rsatib kelayotgandi.

Farg‘ona tumaniga Ilhom Nosirov hokim vazifasini bajaruvchi etib tayinlangan. U 2017 yilning martidan shu kungacha Farg‘ona viloyati hokimining yoshlar siyosati, ijtimoiy rivojlantirish va ma'naviy-ma'rifiy ishlar bo‘yicha o‘rinbosari sifatida ishlab kelayotgandi.

 Eslatib o‘tamiz, 14 oktabr kuni O‘zbekiston bosh vaziri Abdulla Aripov raisligida o‘tkazilgan selektorda hukumat rahbari viloyat hokimlariga 15 oktabrgacha 10 nafar (tuman va shahar) hokimlarni ishdan olish bo‘yicha taqdimnoma kiritish haqida topshiriq bergandi.