Umumta'lim muassasalari faoliyatini tekshirish ishlari tartibga solinadi

Normativ-huquqiy hujjatlar loyihalari muhokamasi portalida Vazirlar Mahkamasining “Umumta'lim muassasalari faoliyatini tekshirish ishlarini tartibga solish chora-tadbirlari to‘g‘risida”gi qarori loyihasi joylashtirildi.

Hujjat bilan umumta'lim muassasalari faoliyatini tekshirish tartibi to‘g‘risidagi nizom, umumta'lim muassasalari faoliyatini tekshirishga vakolatli davlat organlari va tashkilotlar ro‘yxati tasdiqlanishi mumkin.

Umumta'lim muassasalari faoliyatini tekshirish tartibi to‘g‘risidagi nizomga ko‘ra, umumta'lim muassasalari faoliyatini tekshirishning vazifalari quyidagilardan iborat:

umumta'lim muassasalaridagi o‘quv-tarbiya jarayonining sifati, o‘qituvchilarning bilim darajasini va pedagogik mahoratini oshirishga ko‘maklashish;

qonun hujjatlari buzilishi holatlarini chuqur tahlil qilish va ularni sodir etish shart-sharoitlarini bartaraf qilish bo‘yicha aniq chora-tadbirlarni ishlab chiqish;

amaldagi normativ-huquqiy hujjatlar ijrosining o‘z vaqtida va sifatli ravishda ta'minlanishini tashkil etish;

umumta'lim muassasalari faoliyatida kam samarali taftishlarni qisqartirish bilan bir vaqtda to‘laqonli tekshirishlar samaradorligini oshirish;

umumta'lim muassasalari faoliyatidagi ochiqlik,shaffoflik va hisobdorlikni ta'minlash, o‘quv-tarbiya jarayoni ustidan samarali davlat va jamoatchilik nazoratini o‘rnatish;

umumta'lim muassasalari tomonidan jismoniy va yuridik shaxslarning murojaatlarini ko‘rib chiqish hamda ularning huquqlari, erkinliklari va qonuniy manfaatlariga rioya etilishini ta'minlash;

davlat organlari va tashkilotlarining umumta'lim muassasalari faoliyati bilan bog‘liq vazifalari, funksiyalari va vakolatlarini aniq belgilash va tartibga solish.

Umumta'lim muassasalarining faoliyatini tekshirish quyidagi shakllarda amalga oshiriladi:

rejali tekshirish;
rejadan tashqari tekshirish;
nazorat tartibida tekshirish;
statistik ma'lumotlar va boshqa turdagi ma'lumotlarni tahlil qilish.

Umumta'lim muassasalarining faoliyatini tekshirish vakolatiga ega bo‘lgan davlat organlari va boshqa tashkilotlar ro‘yxatiga ko‘ra, To‘g‘ridan to‘g‘ri tekshirishga vakolatli organlar:

O‘zbekiston Respublikasi Bosh prokuraturasi va unga bo‘ysunuvchi prokuratura organlari;

O‘zbekiston Respublikasi Vazirlar Mahkamasi huzuridagi Ta'lim sifatini nazorat qilish davlat inspeksiyasi va uning hududiy bo‘linmalari;

Tasarrufida umumta'lim muassasasi bo‘lgan vazirlik va idoralar.

Kelishuv asosida tekshirishga vakolatli organlar:

O‘zbekiston Respublikasi Oliy Majlisining Senati, O‘zbekiston Respublikasi Qonunchilik palatasi, viloyat, tuman va shahar Kengashlari deputatlari;

O‘zbekiston Respublikasi Adliya vazirligi va uning hududiy bo‘linmalari;

O‘zbekiston Respublikasi Ichki ishlar vazirligi va uning voyaga yetmaganlar o‘rtasida nazoratsizlik va huquqbuzarliklarning profilaktikasini amalga oshiruvchi maxsus bo‘linmalari, Davlat yong‘in xavfsizligi xizmati va uning hududiy bo‘linmalari;

O‘zbekiston Respublikasi Sog‘liqni saqlash vazirligining Davlat sanitariya-epidemiologiya nazorati respublika markazi va hududiy davlat sanitariya-epidemiologiya nazorati markazlari;

O‘zbekiston Respublikasi Bandlik va mehnat munosabatlari vazirligi va uning hududiy bandlikka ko‘maklashish va aholini ish bilan ta'minlash markazlari;

O‘zbekiston Respublikasi Hisob palatasi, O‘zbekiston Respublikasi Moliya vazirligi va uning tasarrufidagi vakolatli organlar;

O‘zbekiston Respublikasi Favqulodda vaziyatlar vazirligi va uning hududiy bo‘linmalari;

O‘zbekiston Respublikasi Ekologiya va atrof-muhitni muhofaza qilish davlat qo‘mitasi va uning hududiy bo‘linmalari.