Maktab bitiruvchilarini rag‘batlantirish yanada takomillashtiriladi

Normativ-huquqiy hujjatlar loyihalari muhokamasi portalida Vazirlar Mahkamasining “Umumiy o‘rta ta'lim muassasalari bitiruvchilarini rag‘batlantirishni yanada takomillashtirish chora-tadbirlari to‘g‘risida”gi qarori joylashtirildi.

Hujjat bilan O‘zbekiston Respublikasi Xalq ta'limi vazirligi, Oliy va o‘rta maxsus ta'lim vazirligining umumta'lim maktablari, shu jumladan, ixtisoslashtirilgan maktablar, ixtisoslashtirilgan san'at va madaniyat maktab-internatlari, ixtisoslashtirilgan olimpiya zaxiralari maktab-internatlari hamda akademik litseylar bitiruvchilariga a'lo bilimi, namunali xulqi va jamoat ishlaridagi faolligi uchun beriladigan oltin va kumush medallarni ta'sis etish to‘g‘risidagi taklifi ma'qullanishi mumkin.

Belgilab qo‘yilishicha:

oltin medal umumiy o‘rta ta'lim muassasalarining 9-sinfini bitirganlik to‘g‘risidagi a'lo darajali shahodatnomasi mavjud bo‘lgan, 10-11-sinflardagi barcha fanlar bo‘yicha oraliq, yakuniy nazoratlar bo‘yicha hamda choraklik va yillik baholari a'lo bo‘lgan, namunali xulq atvorli va jamoat ishlarida faollik ko‘rsatgan 11-sinf bitiruvchilariga beriladi;

kumush medal umumiy o‘rta ta'lim muassasalarining 9-sinfini bitirganlik to‘g‘risidagi a'lo darajali shahodatnomasi mavjud bo‘lgan, 10-11-sinflardagi barcha fanlar bo‘yicha yillik baholari a'lo bo‘lgan, namunali xulq-atvorli ega bo‘lgan va jamoat ishlarida faollik ko‘rsatgan 11-sinf bitiruvchilariga beriladi.

Quyidagilar:

Umumiy o‘rta ta'lim muassasalari bitiruvchilarini a'lo baholarga o‘qiganligi, namunali xulq-atvori va jamoat ishlaridagi faolligi uchun oltin
va kumush medal bilan taqdirlash tartibi to‘g‘risidagi nizom;

Umumiy o‘rta ta'lim muassasalari bitiruvchilariga a'lo baholarga o‘qiganligi, namunali xulq-atvori va jamoat ishlaridagi faolligi uchun beriladigan oltin va kumush medallarning tavsifi tasdiqlanadi.

O‘zbekiston Respublikasi Xalq ta'limi vazirligi:

umumiy o‘rta ta'lim muassasalari bitiruvchilariga beriladigan oltin
va kumush medallarga bo‘lgan ehtiyojni aniqlash va ularni hisobdan chiqarish muvofiqlashtirilishini;

umumiy o‘rta ta'lim muassasalari bitiruvchilariga beriladigan oltin va kumush medallar o‘quvchilarga xolislik va odillik tamoyillariga amal qilgan holda topshirilishini ta'minlaydi.

“Davlat belgisi” davlat ishlab chiqarish birlashmasi O‘zbekiston Respublikasi Xalq ta'limi vazirligining buyurtmasiga asosan har yili umumiy o‘rta ta'lim muassasalari bitiruvchilariga beriladigan oltin va kumush medallarni tayyorlaydi.