Yevrokuboklar tugab, bugundan kuchli beshlik va boshqa chempionatlarning navbatdagi turlariga start beriladi. O‘yinlar ko‘p, bular orasida Ispaniyada Klasiko, Italiyada Rim – Milan – Neapol to‘qnashuvlari ham bor. Birgina yomon xabar – Yevropadagi vaqt qishki rejimga o‘tayotgani munosabati bilan, endi o‘yinlar biz uchun bir soat kech boshlanadi. Ispaniya va Italiya futboli muxlislari uchun biroz noqulay.
BARSeLONA – ReAL (28 oktabr, 20:15)
Foto: REUTERS
Bu o‘yinni alohida reklama qilish shart emas. Yoki juda keng ravishda to‘xtalib o‘tish kerak aslida. Ispaniya chempionatining eng muhim to‘qnashuvi bo‘lmish El Klasiko 11 yillik tanaffusdan so‘ng birinchi marotaba Messi va Ronaldusiz o‘tmoqda. El Klasikoning g‘ariblashib qolgandek tuyulishi shunchaki, tilga olingan futbolchilarning buyukligidan darak xolos, zero bugungi holatda ham har ikki tomonda munosib yulduzlar bor. Beyl, Isko, Modrich, Koutino, Suares va boshqalar.
Jamoalar bu o‘yinga ikki xil kayfiyatda kirib kelmoqda. «Barselona» Messisiz ham o‘ynay olishini isbotladi va «Inter» ustidan ishonchli g‘alabaga erishdi. «Real» esa, aksincha. Lopetegi shogirdlari nihoyat «Viktoriya» ustidan zafar quchib, g‘alabasiz seriyaga nuqta qo‘ygan bo‘lishsa-da, o‘yin u qadar ishonchli chiqmadi. Shuningdek, La Ligadagi omadsiz seriyaga hali ham barham berilgani yo‘q. Bosim o‘yindan o‘yinga ortib bormoqda va hatto bu o‘yindagi mag‘lubiyat Lopetegining iste'fosi bilan yakunlanishi ham mumkin.
Jarohatlanganlar. Messidan tashqari Samuel Umtiti safda emas, lekin so‘nggi o‘yinlarda Langlle ancha ishonchli ko‘rinmoqda. Mehmonlar tarkibida esa, Marseloning holati biroz tashvishga solgandi, lekin oxirgi yangiliklarga qaraganda, u «Kam Nou»da asosiy tarkibda harakat qilishi kutilmoqda. Demak, faqat Dani Karvaxal El Klasikoda «Real»ga yordam bera olmaydi.
Yana bir qiziq jihat. 2014/15 yilgi mavsumda El Klasikoda har ikki jamoa o‘z maydonida raqibi ustidan g‘alaba qozongandi. Shundan keyin esa, aksincha, «Barselona» Madriddagi bahslarda doimiy tarzda g‘alaba qozoyotgan (4:0, 3:2, 3:0) bo‘lsa-da, Kamp Noudagi o‘yinda yuta olmay kelyapti. O‘tgan mavsumda 2:2, undan oldin 1:1, oldinroq 1:2 hisobi qayd etilgan. Hatto Superkubok doirasidagi o‘yinda ham «Barselona» mag‘lubiyatga uchragan. Demak, «Kamp Nou»dagi El Klasikolar bo‘yicha mezbonlarning g‘alabasiz seriyalari uch yarim yildan beri davom etib kelmoqda.
MANCheSTeR YuNAYTeD – EVeRTON (28 oktabr, 21:00)
Mavzuga oid
Foto: Offside
Bundan buyog‘iga «Manchester Yunayted»ning har bir o‘yini e'tibor qaratishga arziydi: kimdir nihoyat jamoaning ijobiy yo‘nalishga tushib olishiga ishonib, boshqalar Mourinoning iste'fosiga sabab bo‘lishi mumkin bo‘lgan o‘yinni o‘tkazib yubormaslik uchun. Bunday holat ancha avval boshlangan bo‘lsa-da, aniq xulosa qilish qiyin bo‘lyapti: «Nyukasl» bilan ajoyib kambek, lekin bu g‘alaba ishonchli emasdi. «Stemford Brij»da so‘nggi soniyalargacha hisobda oldinda borishdi, ammo o‘sha kuni yirik hisobda mag‘lubiyatga uchrashlari ham mumkin edi. «Yuventus»ga qarshi imkonsiz birinchi bo‘lim. Jamoa o‘ta beqaror va aynan qaysi pallalar haqiqiy «Manchester Yunayted» ekanini aytish qiyin.
«Biz ba'zi futbolchilarga dam berib, tarkibni almashtirish imkoniyatiga ega emasmiz, mavjud futbolchilar bilan maydonga tushishga majburmiz» – dedi Joze Mourino.
So‘nggi ikki o‘yinni bir tarkibda o‘ynagan va hatto YeChL o‘yinida umuman zaxiradan maydonga futbolchi tushirmagan Mourinodan bu borada syurpriz kutish qiyin. Sanches va Fellayni hali ham jarohatlangan, Valensiya masalasi noaniq, murabbiy Lingard haqida ham mujmal javob berdi. Yevrokuboklar tufayli, raqibidan uch kunga kamroq dam olishga majbur bo‘lgan «MYu» jismoniy tarafdan muammolarga duch kelish ehtimoli bor. Mehmonlar tarkibida esa, Fil Jagelka va Jyeyms Makkarti mashg‘ulotlarni boshlashdi, lekin ular «Old Trafford»da maydonga tushishlari so‘roq ostida.
«Everton» yozda transferlar uchun «MYu»dan ham ko‘proq pul sarfladi, ammo ular uchun ham mavsum yaxshi boshlanmagandi. So‘nggi turlarda esa, jamoa o‘z o‘yinini topib olgandek – «Everton» so‘nggi uch o‘yinni g‘alaba bilan yakunlab, turnir jadvalida «Yunayted»ni quvib o‘tdi. Yetti gol urilib, atigi 1ta o‘tkazib yuborildi.
Jamoalar o‘rtasidagi o‘tgan yilgi to‘qnashuv «Old Trafford»da mezbonlarning yirik 4:0 hisobidagi g‘alabasi bilan yakunlangandi. Liverpulda ham Mourino shogirdlari zafar quchishgan – 0:2.
NAPOLI – ROMA (28 oktabrdan 29 oktabrga o‘tar kechasi 00:30)
Foto: AP
«Roma» o‘tgan turda kutilmaganda o‘z maydonida SPALga yutqazib qo‘ydi va to‘rt o‘yindan iborat g‘alabali seriyasiga chek qo‘ydi. Ammo Chempionlar Ligasidagi o‘yinda o‘sha mag‘lubiyat ko‘proq tasodif bo‘lganini isbotladi. TsSKAga qarshi o‘yin italiyaliklarning 3:0 hisobidagi g‘alabasi bilan yakuniga yetdi.
«Napoli» ham juda yaxshi formada. Biz buni Parijdagi o‘yinda ham ko‘rdik. Yulduzli «PSJ»ga qarshi Anchelotti jamoasi ancha dadil harakat qildi va ikki marta hisobda oldinda bordi. A Seriyada ham ishlar joyida, jamoa so‘nggi 7 o‘yinning 6tasini g‘alaba (bir o‘yin «Yuventus»dan mag‘lubiyat) bilan yakunlagan.
O‘yin odatiy Italiya top-o‘yinlari singari juda qiziqarli va keskin ruhda o‘tishi shubhasiz. Jamoalar o‘rtasidagi so‘nggi to‘rt o‘yin doim mehmonlarning g‘alabasi bilan yakunlanib kelayotgani ham o‘ziga xos qiziqarli holat. Esingizda bo‘lsa, o‘tgan mavsumdagi Neapoldagi o‘yinda «Roma» 4:2 hisobida g‘alaba qozongan va «Napoli»ning chempionlik uchun imkoniyatlarini ancha pasaytirib yuborgandi. «Yuventus»ni 4 ochkolik farq bilan ta'qib qilib borayotgan «Napoli» bu safar unday xatoni qilmaslikka urinadi.
Tarkiblarga kelsak, «Napoli»da muammolar yo‘q. O‘tgan turda jarohat olgan Insinening «PSJ» bilan o‘yinda maydonga tushganini va hatto gol ham urganini ko‘rdik. Rimliklar safida esa, Diyego Perotti safga qaytgani yo‘q, shuningdek yosh hujumchi Jastin Klyuvert ham maydonga tusha olmasligi haqiqatga yaqinroq.
«PSJ» haqida ham ba'zida eslash uchun Fransiya chempionatining top-o‘yinlariga murojaat qilamiz, lekin parijliklar uchun u yerda top-match umuman qolmagandek. Mana, ikki hafta oldin «Lion» bilan o‘yinni ko‘ringlar, zo‘r bo‘ladi, Depay formaga kirdi, yana bir narsalar deb reklama qilindi. Natija esa – 5:0.
Umuman, «PSJ» Liga 1 ’dagi so‘nggi besh o‘yinda yirik hisobda g‘alaba qozondi, oxirgi ikki o‘yinda esa, raqiblar besh to‘p farqi bilan taslim etildi. «PSJ» kuchli beshlikda yo‘qotishsiz borayotgan yagona peshqadamga aylanib oldi. Bunday holatda Yevropa Chempionlar Ligasida qiyin bo‘lyapti – qattiqroq qarshilikka o‘rganmagan Tuxel jamoasi «Liverpul» bilan ham, «Napoli» bilan ham qiynalib qoldi.
«Marsel» Fransiya chempionatining yetakchi jamoalaridan biri, ko‘p gol urish borasida «PSJ»dan keyingi jamoa. Shunday bo‘lsa-da, parijliklarga munosib qarshilik ko‘rsata oladimi yoki yo‘q, aytish qiyin – o‘yinda durang bo‘lishiyam yoki «PSJ» yana beshta golni urib ketishi ham mumkin. Hammasi mezbonlarga emas, «PSJ»ning o‘yinga qanday kayfiyatda kelishiga bog‘liq. Buning ustiga «Latsio»ga qarshi Yevropa Ligasi o‘yinida marselliklar ishonchsiz harakat qilishdi va 1:3 hisobida mag‘lubiyatga uchrashdi.
O‘zaro o‘yinlar statistikasiga qarasak, «PSJ» so‘nggi yillarda doimiy ravishda, biroz qiyinchilik bilan bo‘lsa-da, Marseldan uch ochko olib ketishga o‘rgangan. Faqat o‘tgan yilning oktabrida bo‘lib o‘tgan o‘yin bundan istisno. O‘shanda mezbonlar o‘yinning oxirgi daqiqalarigacha hisobda oldinda borishgan va hatto Neymarning chetlashtirilishidan keyin bir kishi ko‘p bo‘lib qolishgan. Lekin qo‘shimcha daqiqalarda Edison Kavanining goli hisobni 2:2 ko‘rinishiga keltirgandi.
LATsIO – INTeR (29 oktabrdan 30 oktabrga o‘tar kechasi 00:30)
Foto: Getty Images
Rimning yana bir jamoasi ham bu hafta top raqibga qarshi maydonga tushadi. «Inter» va «Latsio» turnir jadvalida qo‘shni, uchinchi va to‘rtinchi o‘rinlarni egallab turishibdi. «Inter»ning «Barselona»ga qarshi o‘yinini alohida qavs ichiga olib tursak, jamoa juda yaxshi sport formada ekanini va 7 o‘yindan iborat g‘alabalar seriyasini tilga olish mumkin. «Latsio» ham anoyi emas, so‘nggi ikki o‘yinda g‘alaba qozondi, shuningdek, Yevropa Ligasi doirasidagi uchrashuvda «Marsel»ni safarda yengandi. Ha, bu ham bor, «Latsio» Yevropa Ligasida payshanba kuni to‘p surganini e'tiborga olsak, «Inter»ga nisbatan bir kun ko‘proq dam olish imkoniyatiga ega bo‘lmoqda.
Tarkiblar borasida «Inter»ning muammosi og‘irroq – Raja Nainggolanning jarohati bu o‘yinda maydonga tushishga xalaqit bersa kerak.
Har ikki jamoaning ham o‘ziga xos qiziq jihatini, turnir jadvalining yuqorisiga qay yo‘llar bilan chiqib olganini aytib o‘tish kerak. «Latsio» ushbu mavsumdagi uchta top o‘yinini boy berdi – «Napoli», «Yuventus» va «Roma»ga qarshi o‘yinda jamoa ochko ola olmadi. Lekin boshqa o‘yinlarda 100 foizlik natija ko‘rsatmoqda. 6 o‘yin 6 g‘alaba.
«Inter»ning «fishka»si esa, boshqa. Spalletti shogirdlari so‘nggi daqiqalarda gol urib g‘alaba qozonish bo‘yicha ajoyib ko‘rsatkichlar qayd etmoqda. Qozonilgan g‘alabalarning aksariyati kichik hisobda, buning ustiga, so‘nggi daqiqalarda urilgan gollar evaziga qo‘lga kiritilayotganini aytish kerak. Misol uchun, so‘nggi o‘yindagi Milan derbisida ham Ikardi hakam tomonidan qo‘shib berilgan vaqtlarda g‘alaba golini urdi. Demak agar mana shu an'analar yana saqlanib qolsa, «Latsio» odatiy tarzda top o‘yinni «Inter»ning so‘nggi daqiqalardagi odatiy goli tufayli yutqazib qo‘yadi. Ko‘ramiz.
Angliya chempionatida uch jamoa hali mag‘lubiyatga uchragani yo‘q. Shulardan biri «Uembli»da «Tottenhem» sinovidan o‘tadi. Pochettino shogirdlari turnir jadvalida uzoqda emas, oradagi farq atigi ikki ochkoni tashkil qilmoqda. Ya'ni, mezbonlar agar g‘alaba qozonishsa, «Manchester Siti»ni quvib o‘tishi mumkin.
«Tottenhem» hafta o‘rtasida Chempionlar Ligasida alamli o‘yin o‘tkazdi. Eydxovenda hisobda oldinda borgan London klubi o‘yin oxirlarida bir kishi kam bo‘lib qolib, g‘alabani ushlab qola olmadi. Bu durang esa, yakunda «Tottenhem»ning guruh bosqichidan chiqish imkoniyatini juda pasaytirib yubordi. «Manchester Siti» esa aksincha, birinchi turdagi mag‘lubiyatdan keyin o‘ziga kelib olgan va guruhning asosiy favoriti maqomini isbotlamoqda.
Eriksen safga qaytgan, Lamela juda foydali harakatlar qilayotgan bo‘lsa-da, baribir Dele Allining yo‘qligi «Tottenhem»ga bilinyapti, deyish mumkin. Shuningdek, Rouz va Vertongenning jamoaga yordam bera olmayotgani ba'zi o‘rinlarda pand bermoqda. Gvardiola asosiy futbolchilaridan faqat Ilkay Gundo‘g‘anning yordamidan foydalana olmaydi. Esingizda bo‘lsa, aynan Ilkay Gundo‘g‘an o‘tgan yili «Uembli»da bo‘lib o‘tgan g‘alabali o‘yinda gollardan biriga mualliflik qilgandi.
Haftaning eng muhim o‘yinlari
27 oktabr
18:30. BORUSSIYa D - Herta
19:00. LIVeRPUL – Kardiff
21:00. Empoli – YuVeNTUS
23:45. ATLeTIKO – Real Sosedad
28 oktabr
18:30. Bernli – CheLSI
18:30. Kristal Pelas - ARSeNAL
20:15. BARSeLONA – ReAL
21:00. MYu – Everton
21:00. TsSKA – Krasnodar
22:00. MILAN – Sampdoriya
18:30. Verder – BAVARIYa
00:30. NAPOLI – ROMA
29 oktabr
00:30. LATsIO – INTeR
01:00 TOTTeNHEM – MANCheSTeR SITI
