AQSh Turkiyaning NATOdan chiqib ketishi ehtimolini baholadi

AQSh davlat kotibi Mayk Pompeoning ma'lum qilishicha, Turkiyaning NATO tarkibidan chiqib ketishi alyans uchun «muvaffaqiyatsizlik» bo‘ladi. Pompeoning Tony Katz Today radioshousi uchun intervyusi stenogrammasi Davlat departamenti saytida e'lon qilindi.

Davlat kotibining umid qilishicha, Turkiya hukumati Qo‘shma Shtatlar Eronga qaraganda ancha afzalroq ittifoqdosh ekanini anglaydi. Shuningdek, uning tan olishicha, Donald Tramp prezidentlik muddatining boshida AQSh va Turkiya o‘rtasida «murakkab munosabatlar» bo‘lgan. Pompeo qayd etishicha, bu holat so‘nggi paytlarda yaxshilandi.

«Agar bu sodir bo‘lganda edi (Turkiyaning NATO tarkibidan chiqishi), bu NATO uchun ham, Amerika Qo‘shma Shtatlari uchun ham muvaffaqiyatsizlik bo‘lardi. Mening o‘ylashimcha, bunday vaziyat Turkiya xalqi tomonidan ham yaxshi kutib olinmasdi», - deya xulosa qildi Pompeo. 

Eslatib o‘tamiz, avvalroq AQSh va Turkiya prezidentlari Donald Tramp hamda Rajab Toyyib Erdo‘g‘an Qoshiqchi hamda Branson ishini muhokama qilishgandi.