MDH ishtirokchi davlatlari 15ta hujjatni imzoladilar

2 noyabr kuni Mustaqil Davlatlar Hamdo‘stligi ishtirokchi mamlakatlari 15ta hujjatni imzoladilar. Bu haqda Tojikiston bosh vaziri Qohir Rasulzoda tadbir yakunlari bo‘yicha matbuot anjumani davomida xabar berdi.

Uning so‘zlariga qaraganda, tadbir an'anaviy o‘zaro tushunish, ishonch va konstruktiv muloqot ruhida bo‘lib o‘tdi. Yig‘ilish davomida ishtirokchi davlatlarning ko‘p tomonlama hamkorligi turli sohalari bo‘yicha keng ko‘lamli masalalar muhokama qilindi.

«Biz tomonimizdan qabul qilingan qarorlar Hamdo‘stlik doirasidagi ko‘p tomonlama hamkorlikka turtki berishi lozim. Bugungi yig‘ilish yakunlari bo‘yicha MDH doirasida mamlakatlarimiz o‘rtasidagi hamkorlikni yanada kengaytirishga qaratilgan 15ta qaror qabul qilindi. Yuqori texnologiyali energiya uskunalarini ishlab chiqarishni rivojlantirish bo‘yicha davlatlar hamkorlik konsepsiyasi qabul qilinganini alohida ta'kidlamoqchiman. Shuningdek, yadroviy avariyalar va radiatsion avariyaviy vaziyat yuz bergan holatda tayyor turishni ta'minlash hamda oqibatlarni bartaraf etish sohasida mamlakatlarning o‘zaro hamkorligiga oid kelishuv imzolandi», - dedi Tojikiston hukumati rahbari.

Uning qo‘shimcha qilishicha, MDH davlatlari bosh vazirlari 2019 yilga mo‘ljallangan 140ta tadbir rejasini tasdiqlashdi.

Eslatib o‘tamiz, avvalroq O‘zbekiston MDH tashkil topganidan buyon birinchi marta Hamdo‘stlikda raislikni qabul qilmoqchi ekani xabar qilingandi.