Futbolka bilan kifoyalangan Ronaldu va Mertensning qahramonligi – Italiyada tur voqealari
|19:23 / 05.11.201813 91610 min
Dam olish kunlari Italiya chempionatida 11-tur o‘yinlari o‘tkazildi. Unda e'tiborga loyiq bo‘lgan bir qancha voqealar yuz berdi.
«YuVeNTUS»NING MURAKKAB G‘ALABASI, RONALDUDAN GOLLI UZATMA
«Yuventus» o‘z maydonida «Kalyari» bilan bellashib, 3:1 hisobida g‘alaba qozondi. Turinliklar 1-daqiqadayoq Dibala goli evaziga hisobni ochishdi. Shundan so‘ng, o‘yin gollarga boy o‘tadigandek ko‘rindi. Biroq, «Kalyari» nafaqat raqib bosimiga dosh berdi, balki hisobni ham tenglashtirdi. 36-daqiqada Joao Pedro qanotdan jarima maydoniga yetkazilgan to‘pni yaqin masofadan darvozaga yo‘lladi. Ammo, muvozanat tanaffusgacha saqlanib turmadi. Oradan 2 daqiqa o‘tgach, Bradarich o‘z darvozasini ishg‘ol qildi, natijada «Yuventus» yana hisobda oldinga o‘tib oldi. Ikkinchi bo‘lim asabiy tarzda o‘tdi. Mezbonlar faqat uning oxirgi daqiqalarida o‘yin taqdirini hal qilishdi. Ronaldu oshirgan to‘pni Kuadrado yaqin masofadan darvozaga yo‘lladi. Bu portugaliyalik futbolchining chempionatdagi 5-golli uzatmasi bo‘ldi.
O‘yindan so‘ng, «Yuventus» ustozi Massimiliano Allegri g‘alabaga quyidagicha izoh berdi: «Biz yaxshiroq himoyalanishimiz kerak, chunki ko‘p gol o‘tkazib yubormoqdamiz. 85-daqiqada gol o‘tkazib yuborishimizga sal qoldi, natijada durang bo‘lishi ham mumkin edi. Biz bunday sustkashlikka yo‘l qo‘ymasligimiz shart. Hatto, ilk goldan keyin ham o‘yin suratini oshirmadik. Har doim 2-3ta gol urishimizni taxmin qilish qiyin».
Bu natijadan so‘ng, «Yuventus» 31 ochko bilan 1-o‘rinda bormoqda.
«INTeR» «YuVeNTUS»NING ASOSIY TA'QIBChISIGA AYLANMOQDA
Mavzuga oid
«Inter» o‘z maydonida «Jyenoa» bilan bellashdi va yirik - 5:0 hisobida g‘alaba qozondi. Milanliklar hujumda va himoyada juda yaxshi harakat qilib, ishonchli yutuqqa erishdilar. O‘yinda Joau Mariu 1ta gol urib, 3ta golli uzatmani amalga oshirdi va haqiqiy qahramonga aylandi.
Bu «Inter»ning qatorasiga 7-g‘alabasi bo‘ldi. Bu natijadan so‘ng, «neradzurri» 25 ochko bilan 2-o‘ringa chiqib oldi va «Yuventus»ning yaqin ta'qibchisiga aylandi.
O‘yindan so‘ng, «Inter» ustozi Luchano Spalletti g‘alabaga quyidagicha izoh berdi: «Biz har bir o‘yinni noldan boshlashimiz kerak, aks holda hech narsaga erisholmaymiz. Jamoaning ishtiyoqi baland va to‘g‘ri edi. Eng yoqimlisi – 70 ming muxlis g‘alabamizdan xursand bo‘ldi. Futbol juda o‘zgarib ketdi. To‘pni nazorat qilish – asosiy jihatga aylanib bormoqda».
MeRTeNSNING HeT-TRIGI «NAPOLI»GA YIRIK G‘ALABA KeLTIRDI
«Napoli» o‘z maydonida «Empoli» bilan bellashdi va 5:1 hisobidagi oson g‘alabani qo‘lga kiritdi. Neapolliklar raqibdan har tomonlama ustun ekanligini maydonda namoyish qila olishdi. Belgiyalik hujumchi Dris Mertens o‘yinda uchta gol urib, 1ta golli uzatmani amalga oshirdi va haqiqiy qahramonga aylandi. Bundan tashqari, u A Seriyada urgan gollari sonini 74taga yetkazib, vatandoshi Luis Oliveyradan (72) o‘zib ketib, Italiya chempionati tarixidagi eng sermahsul belgiyalikka aylandi.
Bu natijadan so‘ng, «Napoli» 25 ochko bilan musobaqa jadvalida 3-o‘rinda bormoqda.
O‘yindan keyin Dris Mertens jamoasining yirik g‘alabasiga quyidagicha izoh berdi: «Napoli» juda yaxshi o‘ynayapti, buni ko‘ryapsiz. Bizda ko‘plab iqtidorli futbolchilar bor va hammamiz birgalikda yuksalishda davom etmoqchimiz. Men har bir o‘yinda maydonga tushishni istayman. G‘alaba va gollarga chanqoqman. «Roma»ga (1:1) qarshi bahsda 2-bo‘limda zaxiradan tushdim, albatta bundan norozi edim. O‘yindan keyin intervyu berishga tayyor emasdim. Ammo, bosh murabbiy Karlo Anchelotti bilan suhbatlashib, barcha tushunmovchilikka barham berdik».
«MILAN» G‘ALABALI SeRIYaSINI DAVOM ETTIRIB, KUChLI TO‘RTLIKDA QOLDI
«Milan» safarda «Udineze» bilan o‘ynadi va 1:0 hisobida g‘alaba qozondi. O‘yin teng kurashlar ostida o‘tdi. Har ikkala jamoada gol urish uchun bir qancha vaziyatlar bo‘ldi. Ammo muxlislar golni o‘yin so‘ngida ko‘rishdi. Hakam tomonidan qo‘shib berilgan daqiqalarning oltinchisida «Milan» raqibni qarshi hujumda ushladi va Romanoli jamoasiga g‘alaba keltiruvchi golni urdi. Bu «Milan»ning qatorasiga uchinchi g‘alabasi bo‘ldi. Bundan tashqari, jamoa so‘nggi 17ta o‘yinda ilk marotaba o‘z darvozasi daxlsizligini saqlab qoldi. Bu natijadan so‘ng, «Milan» 21 ochko bilan kuchli to‘rtlikdagi o‘rnini saqlab qoldi.
O‘yindan so‘ng «rossoneri» ustozi Jyennaro Gattuzo g‘alabaga quyidagicha izoh berdi: «Bizda jarohat olganlar ko‘p edi. «Udineze» – jismonan kuchli, hujumkor va xavfli raqib. Menga yigitlarning jonkuyarligi yoqdi. Qatorasiga uchinchi g‘alaba? Bu hech narsani anglatmaydi, ishlash kerak va oldinga intilish lozim. Bu g‘alabalar yelkamizdagi tog‘ni ag‘darib tashlashga yordam beradi xolos».
A SeRIYa 12-TUR O‘YINLARI
9 noyabr
Frozinone - Fiorentina
10 noyabr
Torino - Parma
SPAL - Kalyari
Jyenoa - Napoli
11 noyabr
Atalanta - Inter
Kevo - Bolonya
Roma - Sampdoriya
Empoli - Udineze
Sassuolo - Latsio
Milan – Yuventus
RONALDUGA 400-RAQAMLI FUTBOLKA TOPShIRILDI
«Yuventus» prezidenti Andrea Anelli hujumchi Krishtianu Ronalduga 400-raqamli futbolkani topshirdi.
Shu tariqa klub portugaliyalik to‘purarni yubiley marra bilan tabrikladi. Avvalroq, Ronaldu Yevropaning top-5 chempionatlarida birinchi bo‘lib 400ta gol urgan edi. Futbolchi bu gollarni «Manchester Yunayted», «Real» va «Yuventus» safida urgan.
SIRIGU - TOP-5 CheMPIONATLARINING ENG YaXShI DARVOZABONI
«Torino» darvozaboni Salvatore Sirigu «Sampdoriya»ga (4:1) qarshi o‘yinda penaltini qaytarishga muvaffaq bo‘ldi.
Futbolchi 65-daqiqada Fabio Kvalyarellaning «nuqta»dan yo‘llagan zarbasini golga aylanishiga yo‘l qo‘ymadi.
Sirigu 2018 yil davomida o‘z darvozasi tomon belgilangan 5ta penaltidan 4tasini qaytara olgan. Bu ko‘rsatkich bo‘yicha u top-5 ligalarda yetakchilik qilmoqda.
«YuVeNTUS» O‘Z TARIXIDAGI ENG YaXShI STARTNI QAYD ETDI
«Yuventus» A Seriyaning ilk 11ta turida 10 marta g‘alaba qozondi va 1 marta durang o‘ynadi.
Opta xabariga ko‘ra, bu klub tarixidagi eng yaxshi startdir. Ayni paytda jamoa eng yaqin ta'qibchilari «Inter» va «Napoli»ni 6 ochko ortda qoldirmoqda.
