O‘zbekiston Xususiy sayyohlik tashkilotlar uyushmasi (XSTU) o‘z tuzilmasida mehmon uylarini qo‘llab-quvvatlovchi va rivojlantiruvchi bo‘lim faoliyatini yo‘lga qo‘yishni rejalashtirmoqda. XSTU raisi Gulchehra Isroilova KUN.UZ muxbiriga shu haqida ma'lum qildi.
Yevropa Ittifoqining "Markaziy Osiyo barqaror va iqtisodiy rivojlanishi uchun biznes-uyushmalar orqali qishloq va ekoturizmni kuchaytirish" loyihasining bosh menejyeri Naut Kasters bilan uchrashuv yakunlariga ko‘ra, shunday bayonot bildirildi.
Loyiha doirasida mehmon uylari salohiyatini rivojlantirishga yo‘naltirilgan tadbirlar o‘tkazilmoqda. Dastur bir necha yil ilgari mamlakat rahbariyati tomonidan mehmon uylarini ro‘yxatdan o‘tkazishni maksimal darajada soddalashtirish va tadbirkorlarning xususiy mehmon uylarini yaratishlarini faollashtirishga doir qaror qabul qilinganidan so‘ng yanada dolzarb ahamiyat kasb etdi.
"Mazkur loyihaning eng muhim yo‘nalishlaridan biri mehmon uylari rivojlanishiga turtki beruvchi Mehmon uylari jamoatchilik birlashmasi faoliyatini yo‘lga qo‘yish tashabbusi hisoblanadi", - deydi Gulchehra Isroilova. - Biroq biz bu masalani uyushmamiz tuzilmasida shunday bo‘lim ochish bilan hal qilishni taklif etamiz. Bu bo‘lim mehmon uylarini turistik infratuzilmaning ajralmas qismi sifatida rivojlantirish masalalari bilan shug‘ullanadi.
XSTU mehmon uylarini qo‘llab-quvvatlashda salmoqli tajribaga ega. Uyushma mehmon uylariga xizmat ko‘rsatish darajasini oshirishga yo‘naltirilgan konsalting va ta'lim dasturlarini taklif qilishga tayyor. Shuningdek, mehmon uylari egalariga o‘z mahsulotlarini targ‘ib qilishda ko‘mak berishni rejalashtirmoqda.
Bugunga kelib, XSTU eng yirik turistik operatorlar birlashmasi hisoblanadi. Ushbu "oila"ga mehmon uylarining qabul qilinishi bir sohada ishlovchi tadbirkorlik sub'yektlari o‘rtasida o‘zaro manfaatli aloqalar o‘rnatilishi yo‘lida xizmat qiladi.
