Ikki-uch haftadan buyon Arabiston yarimorolida noqulay ob-havo sharoiti hukmron bo‘lib turibdi. Kuchli yomg‘irlar mintaqaning qator davlatlarida ko‘plab talofatlarga sabab bo‘lmoqda. Saudiya Arabistoni sharqida tabiiy iqlim ofatidan himoyalanishning «qizil» rejimiga o‘tildi, Iordaniyada esa suv toshqinlari oqibatida halok bo‘lganlar soni 12 nafarga yetdi.
Saudiyadagi yomg‘ir ayniqsa payshanba va juma kunlari kuchaydi: sharros jala quyishi barobarida momaqaldiroq va chaqmoq chaqishi ham kuzatildi. Dengiz sathidan nisbatan baland provinsiyalarda yong‘oq kattaligida do‘l yog‘di, ayrim hududlarda shamol tezligi sharqdan sekundiga 40 metr tezlikkacha yetdi. Natijada qum bo‘ronlari ko‘tarildi, bu transport harakati uchun ko‘rish imkoniyatini cheklab qo‘ydi. 8 noyabrdan 9 noyabrga o‘tar kechasi tun davomida qirollikning aksariyat hududi tuman ostida qoldi.
Umuman, Saudiya Arabistonining aksariyat yirik shaharlari – Jidda, Makka, Madina, Ar-Riyodda 28 oktabrdan buyon yomg‘ir tinmayapti. Saudi Gazette`ning yozishicha, birgina Jidda shahrida ofat oqibatlari bilan kurashish, asosiy yo‘llardagi suvni nasoslar yordamida bartaraf etish uchun 1700 xodim va 837 ta texnik vosita jalb etilgan.
Foto: Okaz
Shuningdek, kecha Ar-Riyodda esa kuchli jala oqibatida qirol Xolid nomidagi xalqaro aeroport tomi o‘pirilib tushdi, buning natijasida bino suvga to‘ldi.
Saudi Arabia King Khalid Intl Airport Riyadh inundates as a result of torrential rains pic.twitter.com/z07IOw1c6f
— Khalid khi (@khalid_pk) November 9, 2018
