Bugun, 13 noyabr kuni Pro-liga «A» guruhida 35-tur uchrashuvlari bo‘lib o‘tdi. Qayd etilgan natijalarga ko‘ra, chempionat yakunlanishiga bir tur oldin guruhda dastlabki uch o‘rindan joy oladigan jamoalar nomi ma'lum bo‘ldi.
Jumladan, bugun «Istiqlol»dan ustun kelgan «Andijon» so‘nggi turda qanday natija qayd etishidan qat'i nazar, 1-o‘rinni egallashi oydinlashdi. Ayni paytda 2-pog‘onada borayotgan «Mash'al» «Andijon»dan 3 ochko ortda bo‘lsa ham, o‘zaro o‘yinlar natijasiga ko‘ra, muborakliklar so‘nggi turdan keyin «Andijon»dan oldinga o‘tib keta olmaydi.
«Pro-liga «A» guruhida 1-o‘rinni egallaydigan jamoa kelasi yili Superligada qatnashish imkoniyatiga ega bo‘ladi. Shu sababdan PFL bosh direktori Omon G‘ofurov boshchiligidagi ishchi guruh bugun Andijonda bo‘ldi va klubning ayni paytdagi holati va kelasi mavsum uchun rejalari bilan tanishdi. Qolaversa, markaziy o‘yinni bevosita «Sog‘lom avlod» o‘yingohidan kuzatdi», - deb xabar berdi tashkilot rasmiy sayti.
«Andijon» Pro-ligada g‘oliblikni qo‘lga kiritgan bo‘lsa-da, yaqinda ishlab chiqilgan «O‘FA va PFL doirasidagi musobaqalarda ishtirok etuvchi futbol klublarini litsenziyalash va professional futbol klubi maqomini belgilash bo‘yicha reglament» talablarini bajarish uchun jiddiy bel bog‘lashi shart.
Bugungi tur o‘yinlaridan so‘ng Pro-liga «A» guruhida 2 va 3-o‘rin egalari nomi ham aniq bo‘ldi. «Mash'al» jamoasi 2-o‘rinni naqd qilib ulgurgan bo‘lsa, «Istiqlol» 3-pog‘onaga joylashishi oydinlashdi. Zero, «Istiqlol»dan bir ochko kam jamg‘argan «Surxon» uchun 2018 yilgi mavsum yakunlandi. Termizliklar so‘nggi turda dam olishadi.
Pro-liga
35-tur / 13 noyabr, seshanba
Andijon – Istiqlol 2:1
Gollar: Javohir Rasulov (0-1), Nodir Mavlonov (1-1), Shahboz Jumaboyev (2-1)
Norin – Mash'al 1:3
Gollar: Xumoyun Murtazoyev (0-1), Baxtiyor Qosimov (1-1), Jamoliddin Ubaydullayev (1-2), Xumoyun Murtazoyev (1-3).
Orol – Xorazm 1:3
