Qashqadaryoda «Koson-agro» EIZ tashkil etiladi

Normativ-huquqiy hujjatlar loyihalari muhokamasi portalida “Koson-agro” erkin iqtisodiy zonasini tashkil etish chora-tadbirlari to‘g‘risida”gi prezident qarori loyihasi joylashtirildi.

Hujjat bilan Qashqadaryo viloyati hokimligi, O‘zbekiston Respublikasi Qishloq xo‘jaligi vazirligi, Iqtisodiyot vazirligi, Moliya vazirligi, Investitsiyalar bo‘yicha davlat qo‘mitasi va “O‘zbekoziqovqatxolding” XKning Qashqadaryo viloyatida “Koson-agro” erkin iqtisodiy zonasini tashkil etish to‘g‘risidagi taklifi qabul qilinishi mumkin.

Qashqadaryo viloyati erkin iqtisodiy zonalar va kichik sanoat zonalarining ma'muriy kengashi:

O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi Qishloq xo‘jaligi vazirligi, Qurilish vazirligi bilan birgalikda “Koson-agro” EIZ tarkibiga kiritiladigan Koson tuman “Turon” hududidan 5 ming gektar yaylov yer maydonlarining chegaralarini aniq belgilanish bo‘yicha takliflarni Vazirlar Mahkamasiga kiritilishini ta'minlaydi;

manfaatdor vazirliklar va idoralar bilan birgalikda “Koson-agro” EIZni rivojlantirish, shu jumladan, ilg‘or texnologiyalarni qo‘llagan holda qishloq xo‘jaligi mahsulotlari ishlab chiqarish va qayta ishlash korxonalarini barpo etish uchun uskuna va jihozlar ishlab chiqarishga ixtisoslashtirilgan mahalliy korxonalar tashkil etish dasturini ishlab chiqadi hamda erkin iqtisodiy zonalar va kichik sanoat zonalari ma'muriy kengashlari faoliyatini muvofiqlashtirish bo‘yicha Respublika kengashi muhokamasiga kiritadi.

“Koson-agro” EIZning asosiy vazifalari va faoliyati yo‘nalishlari etib quyidagilar belgilanadi:

qishloq xo‘jaligida yer va boshqa tabiiy resurslardan foydalanish samaradorligini oshirish, qishloq xo‘jaligini diversifikatsiya qilish hamda tarkibiy o‘zgartirish, bunda tumandagi unumdorligi past, kam hosilli yer maydonlaridan samarali foydalanishni tashkil etish;

qishloq xo‘jalik mahsulotlari ishlab chiqarish va qayta ishlash texnologiyalarini qo‘llagan holda, klaster usuli asosida tashkil etishga to‘g‘ridan-to‘g‘ri xorijiy va mahalliy investitsiyalar jalb qilish, shuningdek, zamonaviy energiya tejovchi issiqxonalar qurish uchun konstruksiyalar, jihozlar va boshqa butlovchi buyumlar ishlab chiqarishni tashkil etish;

hududning ishlab chiqarish va resurs salohiyatidan samarali foydalanish asosida qishloq xo‘jaligi mahsulotlarini ishlab chiqarishni kengaytirish, qayta ishlashni chuqurlashtirish va ularning eksport hajmini oshirish;

logistika xizmatlari ko‘rsatishning zamonaviy infratuzilmasini shakllantirish, qishloq xo‘jaligi sohasidagi ishlab chiqarish sub'yektlariga ular tomonidan yetishtirilgan mahsulotlar eksportini tashkil etishda ko‘maklashish;

qishloq xo‘jalik mahsulotlari ishlab chiqarish va qayta ishlash korxonalarini tashkil etishda zamonaviy resurs tejovchi texnologiyalarni, muqobil issiqlik energiyalardan foydalanishni keng joriy etish;

ishlab chiqarilayotgan mahsulotlarni standartlashtirish, sertifikatlashtirish va markirovka qilish bo‘yicha xalqaro standartlarga muvofiq ilmiy-ishlab chiqarish markazlari tashkil etish va ularning xulosalari xalqaro darajada e'tirof etilishini ta'minlash chora-tadbirlarini ko‘rish.

Belgilab qo‘yilishicha:

“Koson-agro” EIZ tarkibiga kiritilgan yer maydonlari Qashqadaryo viloyati erkin iqtisodiy zonalar va kichik sanoat zonalari ma'muriy kengashining bevosita tasarrufida bo‘ladi;

“Koson-agro” EIZning faoliyat ko‘rsatish muddati u tashkil etilgan kundan boshlab, mazkur muddatni keyinchalik uzaytirish imkoniyati bilan 30 yilni tashkil qiladi;

“Koson-agro” EIZning faoliyat ko‘rsatishi muddati mobaynida uning hududida alohida soliq va bojxona rejimlari amal qiladi.