Qonunlardan ustav fondlarining eng kam miqdorlari chiqarib tashlanadi

Adliya vazirligi tegishli tuzatishlar loyihasini ishlab chiqdi, u Qonun hujjatlari ta'sirini baholash tizimi portalida muhokama qilinmoqda.

Norma’ning yozishicha, ayni paytda qonun hujjatlarida ayrim tashkiliy-huquqiy shakldagi yuridik shaxslarning eng kam ustav fondi to‘g‘risidagi talablar belgilangan.

Bu holat hozirgi tamoyillarga javob bermay qoldi. Xususan, jamiyatlarning ustav kapitaliga qo‘yiladigan minimal talablar faqat milliy valyutada belgilanishi shart. Shu sababli AJdagi ustav fondining eng kam miqdori 1 600 mln so‘m darajasida etib belgilandi. Keyin esa davlat rahbari idoralarning uni 400 mln so‘mgacha pasaytirish to‘g‘risidagi takliflarini ma'qulladi. Har bir ana shunday o‘zgartirish bo‘yicha qonunga tuzatishlar kiritish zarur.    
 
Davlat tomonidan tadbirkorlik faoliyatini erkinlashtirish yo‘nalishi tanlangani inobatga olingan holda, jadvalda ko‘rsatilgan qonun hujjatlaridan ustav fondining eng kam miqdori to‘g‘risidagi talablarni chiqarib tashlash taklif etilmoqda.
 
Bu muassislarga ustav fondi miqdorini ustavda qayd etib, uning qanday bo‘lishini mustaqil ravishda belgilash imkonini beradi. Biroq ustav fondining eng kam miqdori litsenziya talabi sifatida qayd etilishi mumkin. Eslatib o‘tamiz, bugungi kunda quyidagilarni litsenziyalashda ana shunday shartlar amal qiladi:

• bank faoliyati (kamida 100 mlrd so‘m);
• mikrokredit tashkilotlari (kamida 2 mlrd so‘m);
• lombardlar (kamida 500 mln so‘m);
• sug‘urta faoliyati (sug‘urta faoliyati turlariga qarab tabaqalashtirilgan);
• etil spirti va alkogolli mahsulotlar ishlab chiqarish (kamida 10 000 EKIH);
• lotereyalar tashkil etish bo‘yicha faoliyat (kamida 200 mln so‘m);
• «kirish va chiqish turizmi» yo‘nalishi bo‘yicha faoliyat (kamida 400 EKIH).
 
Loyiha o‘zgartirilishi, unga qo‘shimcha kiritilishi yoki rad etilishi mumkin.