Toshkentda «Delfinlar shousi» o‘tkaziladimi?

O‘zbekiston respublikasi davlat sirkida bo‘lib o‘tishi rejalashtirilgan «Delfinlar shousi» ko‘ngilochar tomoshalari o‘tkazilishi haqida e'lonlar boshlanganiga ham qariyb to‘rt oy bo‘ldi. Dastlab avgust oyining boshida turli ommaviy axborot vositalarida reklama roliklari tarqatildi. Ularda O‘zbekistonda ilk bor o‘tkaziladigan bunday tomoshalar haqida jar solindi. Ammo chiptalar sotilganiga qaramay «Delfinlar shousi» bir necha bor ortga surildi, tomoshalar o‘tkazilmadi. Vaziyatga oydinlik kiritish uchun sirkka yo‘l oldik.

Youtube'da ko‘rish

Mover.uz'da ko‘rish

O‘zbekiston respublikasi davlat sirki direktori Rustam Majidov vaziyatni shunday izohladi:

– «Delfinlar shousi» bir necha marta ortga surilgani rost. Lekin shu o‘rinda bir holatga e'tibor qaratmoqchiman. Biz faqat sirk arenasini ma'lum haq evaziga ijaraga berganmiz, shou o‘tkazilishi, sifatiga javob bermaymiz. Buning uchun maxsus «Delfinlar shousi» MChJ tuzilgan va shu tashkilot bu shouni o‘tkazishni rejalashtirgan. Aytish mumkinki, bu MChJ hozir mazkur tomoshalar o‘tkazilishidan eng ko‘p manfaatdor, chunki juda katta mablag‘ evaziga arena o‘rnida basseyn qurildi, o‘rindiqlar shu shouga moslashtirildi. Shuningdek, «Delfinlar shousi» MChJ o‘tgan vaqt davomida tomoshalar o‘tkazilmaganiga qaramay ijara haqini to‘lab kelmoqda, ya'ni bu yerda sirk yoki davlat manfaatlariga zarar yetkazilmayapti.

Ikkinchi tomonning ham fikrini o‘rganish uchun «Delfinlar shousi» MChJ rahbari Abdulaziz Aliyev bilan ham suhbatlashdik:

– Mustaqilligimizning 27 yillik bayramiga tomoshabinlarga hali bizda bo‘lib o‘tmagan o‘ziga xos tomosha taqdim etmoqchi edik. Ammo rejalarimiz o‘z vaqtida amalga oshmadi. Biz o‘zimizga bog‘liq hamma narsani qildik, ammo dastlabki shartnomamizga ko‘ra delfinlar Rossiyadan keltirilishi kerak edi. Hamma kelishuvlar amalga oshib, delfinlar yo‘lga chiqishi kerak bo‘lib turgan vaqtda Rossiya vakolatli organlari delfinlarni o‘z hududlaridan chiqib ketishlariga yo‘l qo‘yishmadi. Ular qizil kitobga kiritilgani, xavfsizligi kafolatlanmaganini ro‘kach qilishdi. Jonivorlarning xavfsizligi, sog‘-salomatligini ta'minlashimiz bo‘yicha barcha tushuntirishlarimiz inobatga olinmadi.

– Endigi rejalar qanday? Muxlislar «Delfinlar shousi»ni tomosha qilishadimi?

– Xudo xohlasa, «Delfinlar shousi» albatta o‘tkaziladi. Biz xalqimiz, tomoshabinlar oldidagi va'damizni bajarish uchun barcha imkoniyatlarni ishga soldik va hozir Ukraina tomoni bilan kelishuvga erishganmiz. Nasib qilsa, shu hafta oxiriga qadar delfinlar maxsus samolyotda yetib kelishadi. Buning uchun tayyorgarlik ko‘ryapmiz, Ukrainadan alohida mutaxassis yetib kelgan, sovuq tushib qolgani uchun suvni isitish choralari ko‘rilyapti.

– Shou juda ko‘p marta ortga surildi, odamlarning ishonchi so‘nishi tabiiy. Talab qilganlarga chipta pullari qaytarildimi?

– Kim pulini qaytarib olishni istagan bo‘lsa, pullarini qaytardik. Lekin ko‘pchilik «men chiptani oilam, bolalarim uchun olganman, qachon bo‘lsa ham kelib tomosha qilamiz» deyishdi. Sotilgan chiptalar amalda bo‘ladi.

– Chiptalar bahosiga ham to‘xtalib o‘tsangiz.

– Chiptalar 90 ming, 120 ming va 150 mingdan sotilmoqda. Narx qimmat tuyilishi mumkin, buning o‘ziga yarasha sabablari bor. Birinchi navbatda ko‘rib turganingizdek, o‘rindiqlarning quyi qismlaridan foydalanmayapmiz. Bundan tashqari, shouni tashkillashtirish, delfinlarning kelib ketishi va boshqa to‘lovlar anchagina qimmat. Shunga qaramay, shou bu pulga arziydigan darajada bo‘ladi.