OAV: AQSh Eronga yangi ayblov qo‘yadi

AQSh prezidenti Donald Tramp ma'muriyati kelasi hafta Eronni Kimyoviy qurolni taqiqlash bo‘yicha konvensiya qoidalarini buzganlikda ayblamoqchi. Bu haqda Associated Press amerikalik ikki mansabdor shaxsga asosan xabar bermoqda.

Ta'kidlanishicha, Vashington AQSh maxsus xizmatlari ma'lumotlariga asoslanib ayblov e'lon qiladi. Unga ko‘ra, Eronda taqiqlangan moddalar ishlab chiqarish uchun obektlar va asbob-uskunalar mavjud.

Shuningdek, Tehron tomonidan kimyoviy qurolning ishlatilishi haqida hech qanday so‘z yo‘q.

Manbalar ma'lumotiga ko‘ra, Tramp ma'muriyati Eron hukumatiga 19 noyabr, keyingi dushanbada ayblovlar qo‘yishi mumkin.

Eslatib o‘tamiz, avvalroq AQSh prezidenti Donald Tramp telefon orqali muloqot davomida Buyuk Britaniya bosh vaziri Tereza Mey bilan Eron tufayli urishib qolgandi.