Saudiya Arabistoni valiahd shahzodasi Muhammad bin Salmon Katta yigirmatalikning (G20) Argentinada o‘tadigan sammitida qatnashadi. Bu haqda Saudiya Arabistonining energetika, sanoat va ma'danli zaxiralar vaziri Xolid al-Folih ma'lum qildi.
Sammit Buenos-Ayresda 30 noyabr-1 dekabr kunlari bo‘lib o‘tadi.
Yigirmatalikning Gamburgdagi avvalgi uchrashuvida Saudiya Arabistonidan moliya vaziri Muhammad al-Jad'an ishtirok etgandi. Arab OAV ma'lumotlariga ko‘ra, o‘shanda qirollik rahbariyati qo‘shni Qatar bilan yuzaga kelgan diplomatik inqiroz sababli sammitda ishtirok etishni istamagan.
