AQSh prezidenti huzuridagi iqtisodiy maslahatchilar kengashi raisi Kevin Xassetning Xitoy Jahon savdo tashkilotidan (JST) chiqarib yuborilishi haqidagi bayonoti bema'ni va Qo‘shma Shtatlarning takabburligi isbotidir. Bu haqda Xitoy Xalq Respublikasi Tashqi ishlar vazirligining rasmiy vakili Gen Shuan payshanba kuni brifingda ma'lum qildi.
«Jahon savdo tashkiloti - ko‘p tomonlama tashkilot, uning barcha a'zolari bir xil. AQSh Xitoyni JST a'zoligidan bir tomonlama mahrum etish huquqiga ega emas. Bunday bayonot Qo‘shma Shtatlarning takabburligini ko‘rsatadi», - deya ma'lum qildi diplomat.
Foto: Andy Wong / AP
«Hozirda Qo‘shma Shtatlar Xitoyni JST a'zoligidan mahrum qilish kerakligi haqida gapirmoqda. Ertaga ular qaysi mamlakatni chiqarib yuborish haqida bong urisharkin?» - deya savol bilan murojaat qilgan tashqi siyosat idorasi rasmiy vakili. «Agar mening xotiram pand bermasa, Qo‘shma Shtatlar bundan avval JSTdan chiqib ketishni istagandi, endi ular Xitoyni tashkilot a'zoligidan chiqarib tashlash kerakligi haqida gapirishmoqda. Bu bema'nilik», - deya ta'kidlab o‘tdi TIV vakili.
Shuningdek, Gen Shuanning eslatishicha, so‘nggi vaqtlarda aynan Qo‘shma Shtatlar YuNESKO, BMTning Inson huquqlari bo‘yicha kengashi, Butunjahon pochta ittifoqi kabi tashkilotlardagi o‘z a'zoligini to‘xtatdi. «Xalqaro hamjamiyat Amerika Qo‘shma Shtatlarini tegishli tashkilotlar va bitimlardan chiqib ketgani uchun qoralaydi», - deya ma'lum qildi u.
Diplomatning ta'kidlashicha, Xitoy har doim ochiq jahon iqtisodiyotini qurish va ko‘p tomonlama savdo tizimini yaratishga sodiq bo‘lgan. «Joriy yilning iyul oyida JST Xitoy savdo siyosatining yettinchi sharhini e'lon qildi, unda mamlakat tomonidan ko‘p tomonlama savdo tizimi qo‘llab-quvvatlanayotgani va XXRning JSTdagi o‘rni o‘sishiga yuksak baho berildi», - deya xulosa qilgan TIV vakili.
Eslatib o‘tamiz, avvalroq AQSh vitse-prezidenti Mayk Pens savdo urushi qanday shartda to‘xtatilishini aytgandi.
