23 noyabr kuni Respublika Tasviriy san'at galereyasida ilk marotaba Janubiy Koreya davlati rassomlarining «A Beautiful Accompany» ko‘rgazmasi tashkil etildi. O‘zbekiston hukumati tashabbusi bilan tashkil etilgan ko‘rgazmada 16 nafar mahoratli koreys rassomining sara ijod namunalari namoyish etildi. Ular orasida Janubiy Koreyaning ko‘zga ko‘ringan iste'dodli rassomi Min Kyo Kim xonim ham bor. Kun.uz muxbiri ijodkor bilan qisqacha suhbat uyushtirdi.
— Ijod namunalaringiz namoyishi uchun nega aynan O‘zbekistonni tanladingiz?
— Ushbu ko‘rgazma O‘zbekiston Madaniyat vazirligi tashabbusi bilan maxsus tashkil etildi. Menga ham unda o‘z ijod namunalarim bilan qatnashish taklifi bildirildi. Buni mamnuniyat bilan qabul qildim.
— Koreys va o‘zbek madaniyati o‘rtasida qanday o‘xshash hamda farqli jihatlar mavjud, deb o‘ylaysiz?
— Bu yerga kelishdan oldin yurtingiz madaniyati haqida menda deyarli hech qanday ma'lumot yo‘q edi. Ko‘rgazmaga tayyorlanish chog‘ida internet tarmog‘i orqali o‘zbek madaniyati to‘g‘risida ma'lumot qidirib, o‘rganib chiqdim. Haqiqatan ham koreys va o‘zbek odamlarining fe'l-atvorida o‘xshashliklar borligini payqadim. Ikki mamlakatning boy tarixga egaligi ham yana bir muhim jihat. Fikrimcha, mamlakatingiz Osiyoning biroz g‘arblashgan varianti hisoblanadi. Koreyada esa Sharq ildizi juda mustahkam. Bu farqli tomoni, deb o‘ylayman.
— O‘zbekistonda sizga nima ko‘proq yoqdi?
— Milliy taomlaringiz, o‘zbek ayollarining nafosati va shaharlar infratuzilmasi menda katta taassurot qoldirdi.
— Suratlaringizda asosan koreys tabiatini ifoda etgansiz. Demak, go‘zal manzara sizni maftun qila oladi. O‘zbekiston tabiati ham sizda qiziqish uyg‘otdimi? Navbatdagi ijod namunalaringizni shu yerda yaratish g‘oyasi paydo bo‘ldimi?
— Yurtingiz go‘zal manzaralari haqida eshitganman, ammo hali shaxsan tashrif buyurishga muyassar bo‘lmadim. Agar imkoniyat yaratilsa, albatta, buni amalga oshirishdan mamnun bo‘lardim.
Ma'lumot o‘rnida aytib lozimki, O‘zbekiston va Koreya diplomatik aloqalari 27 yilligi munosabatining yorqin namunasi bo‘lgan san'at kechasida jami 75ta asar namoyish etildi. Ularda, asosan, abstrakt syujyetlar, koreys tabiati, qadim xalqning ham zamonaviy, ham ko‘hna nafasi ufurib turibdi.
Shu kabi tadbirlarning tashkil etilishi madaniy aloqalarning yanada mustahkamlanishiga turtki beradi. Ammo tashabbusni faqatgina ko‘rgazma doirasida emas, balki kengroq arenalarda davom ettirish kerak. Buning uchun O‘zbekistonga tashrif buyuruvchi har bir xorij san'at vakiliga ijod qilish uchun zarur sharoitlar yaratish, o‘zbek xalqining boy madaniy merosini namoyish qilish, zamonaviy tilda aytganda - «piar» qilish lozim. Ana shunda milliy turizm rivojlanadi, mamlakat imiji yuksaladi.
