WP: Rossiya va Ukraina o‘rtasidagi keskinlik yanada kuchayadi

Rossiya va Ukraina o‘rtasida ziddiyat dam olish kunlari, ikki mamlakat bir-birini Qora dengizdagi provokatsiyada ayblaganidan so‘ng yanada keskinlashdi, deb yozmoqda The Washington Post.

Nashrning qayd etishicha, hodisa paytida Moskva strategik muhim suv yo‘lini yopdi, Ukraina prezidenti Pyotr Poroshenko esa javob sifatida harbiy holat joriy etilishini bildirdi.

Xususan, 25 noyabr kuni Rossiya Ukrainaning uchta kemasi Kerch bo‘g‘oziga kirishiga yo‘l qo‘ymadi. Ukraina harbiy-dengiz kuchlari ma'lumotiga ko‘ra, rus kemalari Ukraina flotiga qarata o‘t ochib, olti nafar dengizchini yaralashdi, ikkita kemani qo‘lga olishdi. O‘z navbatida, Rossiyaning ma'lum qilishicha, Ukraina floti uning suvlariga noqonuniy kirib kelgan. Ukraina bu pozitsiyaga qo‘shilmadi.

Ukrainadagi harbiy holat rasmiylar va harbiylarga milliy xavfsizlikni ta'minlash uchun kerakli vakolatlarni beradi. U so‘nggi vaqtlarda past reytinglarga ega bo‘lgan Poroshenkoga odatdagidan ko‘proq mustaqil harakat qilishga imkon berishi mumkin. Gazetaning ta'kidlashicha, Rossiya bilan sodir bo‘lgan voqea paytida Kiyevdagi kayfiyat «jangovar» edi. Rossiya Federatsiyasi Tashqi ishlar vazirligi rasmiy vakili Mariya Zaxarova Ukrainani «jinoyatchilar uslublari»dan foydalanganlikda aybladi.

Har ikki davlat BMT Xavfsizlik kengashining favqulodda yig‘ilishini chaqirtirdi. Rossiya - Ukraina qarama-qarshiligi Moskva hamda Kiyev o‘rtasidagi ziddiyat yanada keskinlashishini bildiradi, deyiladi materialda.

WPning yozishicha, Moskva Rossiya prezidenti Vladimir Putin Qrim ko‘prigini ochgach, Kerch bo‘g‘ozi ustidan nazoratni kuchaytirdi. So‘nggi oylarda Rossiya va Ukraina munosabatlaridagi keskinlik nafaqat tobora kuchayib bormoqda, balki yangi sohalarga ham yoyilyapti. Xususan, o‘tgan oy Ukraina pravoslav cherkovi rasman Moskva nazorati ostidan chiqqanidan so‘ng mojaro diniy masalada ham yuz berdi, deyiladi materialda.

Eslatib o‘tamiz, avvalroq Ukraina Rossiyaga talab qo‘ygandi.