O‘zbekiston va Qozog‘iston chegarada transport vositalari to‘planib qolmasligining yo‘lini topdi

Qozog‘iston va O‘zbekiston davlat chegarasidagi chegaraoldi o‘tkazish punktlarida avtotransport vositalarining to‘planib qolishini tartibga solish bo‘yicha choralarni muhokama qildi.

Qozog‘iston Moliya vazirligining Davlat daromadlari qo‘mitasi matbuot xizmati xabariga ko‘ra, uchrashuvda O‘zbekiston Davlat bojxona qo‘mitasi raisi birinchi o‘rinbosari Jasur Oripov, DBQning Toshkent viloyati bo‘yicha Boshqarmasi boshlig‘i Otabek Choriyev, Turkiston oblasti bo‘yicha Davlat daromadlari departamenti rahbari Alibek Tilegenov, Turkiston oblasti bo‘yicha Davlat daromadlari departamenti rahbari o‘rinbosari Yeldos Saudabayev, Qozog‘iston Milliy xavfsizlik qo‘mitasi Chegara xizmatining 2020-harbiy qismi qo‘mondoni o‘rinbosari Yermek Karimov, shuningdek, «Yallama» (O‘zbekiston) va «B.Konisbayev» (Qozog‘iston) bojxona postlari rahbariyati ishtirok etdi. 

Ular «Yallama» va «B.Konisbayev» chegaraoldi o‘tkazish punktlarida avtotransport vositalarining to‘planib qolishi masalasi, O‘zbekiston - Qozog‘iston davlat chegarasidagi boshqa NO‘Plarga avtotransport vositalarini taqsimlash imkoniyatlarini muhokama qilishdi.

Uchrashuv davomida mintaqaviy bo‘linmalar rahbarlari darajasida muntazam nazorat o‘rnatish va yuzaga kelgan muammolarni tezkor choralar (telefon va/yoki boshqa aloqa turlari bo‘yicha) qabul qilish yo‘li bilan hal qilish haqidagi qarorga kelindi.

Shuningdek, chegaradagi o‘tkazish punktlari o‘rtasida yuk oqimlarini bir xil taqsimlashni amalga oshirish imkoniyati bo‘yicha kelishuvga erishildi. Qayd etilishicha, har bir tomon bu maqsadda masalani vakolatli vazirliklar, idoralar, xo‘jalik birlashmalari hamda kompaniyalar bilan ko‘rib chiqishi lozim.