Qirol yubileyi: Shumaxer - 50 yoshda

Foto: Mark Thompson/Getty Images

«Formula-1»ning boshqa ko‘plab yulduzlari kabi, afsonaviy poygachi Mixael Shumaxer ham qachonlardir karting chempionatlarida ishtirok etishdan o‘z faoliyatini boshlagan. Biroq, kamdan-kam kartingchilar «Formula-1»ning yetti karra g‘olibiga aylanadi. Shumaxer «Benneton» tarkibida ikkita chempionlikni qo‘lga kiritdi, so‘ng «Ferrari»ga o‘tib, bu jamoada 13 yil qolib ketdi. Shu vaqt mobaynida u Italiya jamoasini Konstruktorlar kubogidagi g‘alabaga olib keldi hamda shaxsiy hisobda beshta g‘alaba keltirdi.

2006 yilda germaniyalik faoliyatini yakunlashga qaror qildi, sababi endi motivatsiya topishda qiynalar va nisbatan yosh raqobatchilar bilan kurashish tobora murakkablashib borardi. Biroq, 2009 yilda «Mersedes» jamoasi uni poygalarga qaytishga taklif etdi. Shumaxer uch yillik shartnoma imzoladi va oxirigacha ishladi, lekin katta tanaffusdan keyin jiddiy yutuqqa erisha olmadi: faqat bir marta muvaffaqiyat qozondi. 2012 yilda poygachi sportni yakuniy tarzda tark etdi. Ko‘p o‘tmay u bilan fojia yuz berdi: 2013 yil 29 dekabr kuni, tog‘ chang‘isida uchish paytida u trassadan tashqariga chiqib ketdi va boshi bilan qoyaga borib urildi. O‘limdan uni faqat shlem qutqarib qoldi, bosh kiyimi ikkiga bo‘linib ketgandi.

Shumaxer qon quyilish bilan kechgan juda og‘ir bosh miya jarohatini oldi, ikki marta jarrohlik amaliyotidan o‘tkazildi, bir necha oy koma holatida bo‘ldi. Shveytsariyadagi o‘z uyida bir necha yil davomida sportchi tiklanmoqda. OAV ma'lumotiga ko‘ra, Mixael hozirda to‘shakka mixlanmagan va o‘pkaga sun'iy tarzda havo yuborish ehtiyoji yo‘q. Biroq, bu ma'lumotning rasmiy tasdig‘i yo‘q. 3 yanvar kuni afsonaviy pilot 50 yoshga kirdi.