2018 yilda Xitoy aholisi 1,27 million kishiga kamaydi, deb xabar berdi Agence France-Presse.
Pekin universiteti iqtisodchi olimi Su Tszyan va Viskonsin universitetining tug‘ilishlar bo‘yicha mutaxassisi I Fusyan statistika ma'lumotlar tahlilidan so‘ng ana shunday xulosaga keldi.
Olimlar Xitoyda bola tug‘ilishi 2017 yilga nisbatan 2,5 milliontaga kamayganini hisoblab chiqishdi.
Xitoyda aholi soni kamayishi 70 yil ichida ilk bor qayd etildi. I Fusyanning fikricha, bu jarayon bundan keyin ham davom etishi mumkin. U tug‘ilishning kamayishini tug‘ruq yoshidagi ayollar sonining kamayishi va ta'lim, yashash tibbiy xizmatlar xarajatlarining oshib borishi bilan bog‘lamoqda.
Xitoy aholisi soni haqidagi rasmiy ma'lumotlar yanvar oyi oxirida e'lon qilinishi rejalashtirilgan. Xitoy milliy statistika byurosining bildirishicha, 2017 yilda Xitoy aholisi 1,39 milliard kishini tashkil etgan.
