Oramizdagi odamlar. Sariq nimchalilar olami bilan tanishuv

«Mening pulim barakali, halol. Boshida shu ishga kirganimda farzandlarim xohlashmagandi. Ayniqsa, o‘g‘lim juda ham qarshi bo‘ldi: Ona, siz yurasiz, keyin ko‘cha-ko‘yda menga gapirishadi - onangni ko‘cha supuruvchi qilib qo‘ydingmi, boqa olmadingmi, deb menga malomat qilishadi, derdi. Mehnatning yaxshi-yomoni bo‘lmaydi. Dunyoda o‘g‘irlik nomus. Mehnat odamni ko‘kka ko‘taradi, insoniyligini oshiradi. Oldin kimdir obodonlashtirish ishi bilan ham qiziqarmikan, deb o‘ylardim. Internetdan kelgan javoblarni o‘qib ko‘rib, ishim tufayli yana ham g‘ururlandim. Demak, odamlar bizga hali befarq emas ekan, bizning qadrimizga yetadiganlar bor ekan. Bu juda katta baxt. Ba'zida mashina, taksi to‘xtatishga to‘g‘ri keladi. Ustimda ish kiyimimiz bo‘ladi. Taksi bunday xalat kiyganga to‘xtamaydi. Sariq nimcha kiyganlar mashina to‘xtatishi mumkin emasmi?..» - deydi Muharram Mirjalilova.

«Odamlar bizni jinoyatchi, qilgan jinoyatining jazosini o‘tash uchun shu ishda ishlashadi, deb o‘ylashadi. Ba'zida «tozalagan joyimizni ifloslantirmang», degan dashnomimizga «jinoyatchisan, shunga arziysan», degan ta'nalar eshitamiz. Ammo bu noto‘g‘ri. Oramizda o‘qiganlar ham, maktabda dars berganlar ham bor. Har birimiz o‘ziga yarasha sabablar bilan shu ishdamiz. Jazo o‘tayotganlar yo‘q demayman, ammo ular shundoq ham jazolanishmoqda. Noo‘rin ta'nalar bilan yerga urishingiz ortiqcha», - deydi obodonlashtirish xodimlaridan biri.

Bir necha kunlik tasvirga olish ishlari davomida obodonlashtirish xodimlari bilan birga bo‘lib, avvalgi videolavhadan keyin ba'zi muammolarga uchraganliklaridan xabardor bo‘ldik. Xodimlarning ko‘pchiligi intervyu berishdan bosh tortishdi.

Biz bu video orqali mutasaddilarning e'tiborini mavjud muammolarga, aholining e'tiborini insoniylikka qaratmoqchi bo‘lgandik. Zero, o‘zganing mehnatini qadrlash – insonga xos odatdir.

Mo‘tabar Xushvaqtova