O‘zbekiston Respublikasi Xususiylashtirilgan korxonalarga ko‘maklashish va raqobatni rivojlantirish davlat qo‘mitasi raisi birinchi o‘rinbosari lavozimida ishlagan Najmiddin Sharipov yangi tashkil etilgan Monopoliyaga qarshi kurashish qo‘mitasiga rahbar etib tayinlandi. Bu haqda Kun.uz muxbiri xabar bermoqda.
Prezident Shavkat Mirziyoyevning «O‘zbekiston Respublikasi Monopoliyaga qarshi kurashish qo‘mitasi faoliyatini tashkil etish to‘g‘risida»gi qarori bilan ish boshlagan yangi qo‘mita Xususiylashtirilgan korxonalarga ko‘maklashish va raqobatni rivojlantirish davlat qo‘mitasining monopoliyaga qarshi kurashishni tartibga solish, raqobat muhitini rivojlantirish, tabiiy monopoliyalar sub'yektlari faoliyatini nazorat qilish va tovar-xomashyo birjalarini litsenziyalash borasidagi barcha huquqlari, majburiyatlari va shartnomalari bo‘yicha huquqiy vorisi hisoblanadi.
Yangi qo‘mita rahbariyati 2019-2023 yillarda tovar va moliya bozorlarida raqobatni rivojlantirish strategiyasini ishlab chiqishi va O‘zbekiston Respublikasi Vazirlar Mahkamasiga tasdiqlash uchun kiritishi belgilangan.
Ma'lumot uchun, Najmiddin Sharipov 1983 yil tug‘ilgan. 2005 yil Toshkent moliya institutini tamomlab, 2013 yilga qadar Monopoliyadan chiqarish va raqobatni rivojlantirish davlat qo‘mitasida turli lavozimlarda ishlagan. Sharipov 2013-2016 yillarda qayta tashkil etilgan Xususiylashtirish, monopoliyadan chiqarish va raqobatni rivojlantirish davlat qo‘mitasi tizimida ishladi. 2016-2018 yillarda esa Vazirlar Mahkamasida, 2018 yil 10 maydan e'tiboran O‘zbekiston Respublikasi Xususiylashtirilgan korxonalarga ko‘maklashish va raqobatni rivojlantirish davlat qo‘mitasi raisi birinchi o‘rinbosari sifatida faoliyatini davom ettirib kelayotgandi.
