Vazirlar Mahkamasining “Jizzax viloyatining Zafarobod tumanida sement zavodi qurilishini tashkil etish chora-tadbirlari to‘g‘risida”gi qarori qabul qilindi
Qayd etilishicha, prezidentning “2018-2019 yillarda investitsiyaviy va infratuzilmaviy loyihalarni amalga oshirishni jadallashtirishga oid qo‘shimcha chora-tadbirlar to‘g‘risida” 2018 yil 19 iyuldagi PQ-3874-son qaroriga muvofiq “Huaxin Cement’' Co LTD (XXP) kompaniyasi tomonidan umumiy qiymati 150,0 mln AQSh dollarilik bir yilda 1,2 mln tonna portlandsement ishlab chiqarish quvvatiga ega bo‘lgan sement zavodi qurilishi nazarda tutilgan. Investitsiya loyihasini amalga oshirish doirasida "Huaxin Cement” So LTD (XXR) kompaniyasi tomonidan mas'uliyati cheklangan jamiyat shaklida “Huaxin Cement Jizzakh" xorijiy korxona tashkil etilgan.
Investitsiyalar va tashqi savdo vazirligi:
bir oy muddatda investor bilan investitsiya shartnomasi belgilangan tartibda tuzilishini ta'minlaydi, unda investorning huquq va majburiyatlarini, investitsiyalar hajmini, tashkil etiladigan ish o‘rinlarining rejalashtiriladigan sonini, investorga beriladigan imtiyozlar va preferensiyalarni hamda dastlabki texnik-iqtisodiy parametrlarni hisobga olgan holda boshqa investitsiya majburiyatlarini va ijtimoiy majburiyatlarni nazarda tutadi;
investitsiya shartnomasidan kelib chiqadigan majburiyatlar investor tomonidan bajarilishi yuzasidan nazoratni ta'minlaydi.
Jizzax viloyati hokimligi Yer resurslari, geodeziya, kartografiya va davlat kadastri davlat qo‘mitasi bilan birgalikda bir oy muddatda investitsiya loyihasini amalga oshirish doirasida sement zavodi qurilishi uchun Jizzax viloyatining Zafarobod tumani hududida 81 ga qishloq xo‘jaligida foydalanilmaydigan yer uchastkasi ajratilishini ta'minlaydi.
“Huaxin Cement Jizzakh" MChJ XKga investitsiya loyihasini amalga oshirish doirasida qurilish-montaj ishlarini 2019 yil 1 iyulgacha muddatda loyiha-smeta hujjatlarini bir vaqtning o‘zida ishlab chiqish bilan amalga oshirishga istisno tariqasida ruxsat berildi.
Avtomobil yo‘llari davlat qo‘mitasi, Uy-joy kommunal xizmat ko‘rsatish vazirligi, “O‘zbekenergo" AJ, "O‘zbekiston temir yo‘llari" AJ va “O‘ztransgaz” AJ qurilayotgan sement zavodi tashqi muhandislik va transport kommunikatsiyalariga ulanishida “Huaxin Cement Jizzakh” MChJ XKga zarur yordam beradi.
Davlat geologiya va mineral resurslar qo‘mitasi istisno tariqasida “Huaxin Cement Jizzakh" MChJ XKga noruda foydali qazilmalar mavjud bo‘lgan yer qa'ri uchastkalaridan foydalanish huquqiga, shu jumladan, Forish konida glina qazish va Jizzax viloyatida joylashgan Sharqiy Uchqo‘rg‘on konida ohaktosh qazish uchun to‘g‘ridan-to‘g‘ri muzokaralar asosida litsenziyalar berilishini ta'minlaydi.
