Dasturiy ta'minot vositalari eksporti va importi to‘g‘risidagi nizomga o‘zgartirishlar kiritildi

Axborot texnologiyalari va kommunikatsiyalarni rivojlantirish vazirligi, Tashqi savdo vazirligi, Davlat bojxona qo‘mitasi, Markaziy bank boshqaruvining “Dasturiy ta'minot vositalari eksporti va importi to‘g‘risidagi nizomga o‘zgartirishlar va qo‘shimcha kiritish haqida”gi qarori qabul qilindi.

Dasturiy ta'minot vositalari eksporti va importi to‘g‘risidagi nizomga kiritilayotgan o‘zgartirishlar va qo‘shimcha:

4-band quyidagi tahrirda bayon etildi:

“4. Milliy reyestrga kiritilgan dasturiy ta'minot vositalari ishlab chiquvchisi tomonidan Internet tarmog‘idagi onlayn do‘konlar orqali 5 ming AQSh dollarigacha bo‘lgan dasturiy ta'minot vositalarini eksport shartnomasisiz xorijiy valutaga sotish, Tashqi savdo operatsiyalari yagona elektron axborot tizimiga ma'lumot kiritmasdan amalga oshiriladi.

Dasturiy ta'minot vositalarining eksporti 5 ming AQSh dollaridan oshgan taqdirda, dasturiy ta'minot vositalarining eksport shartnomasi bo‘yicha ma'lumotlar elektron raqamli imzodan foydalangan holda Interaktiv davlat xizmatlari yagona portali orqali Tashqi savdo operatsiyalari yagona elektron axborot tizimiga kiritiladi.”.

7-band kuyidagi mazmundagi xatboshi bilan to‘ldirildi:

“Tushumlarning tushish muddatlari xorijiy onlayn-savdo maydonchasi qoidalariga muvofiq belgilanadi.”.

8-banddagi “vakolatli” degan so‘z “tijorat” degan so‘z bilan almashtirildi.