Mudofaa vazirligi va Milliy gvardiya tasarrufidagi harbiy akademik litseylar “Temurbeklar maktabi” litseylari etib qayta tashkil etiladi 

Normativ-huquqiy hujjatlar loyihalari muhokamasi portalida “Temurbeklar maktabi” harbiy-akademik litseylari faoliyatini yanada takomillashtirish chora-tadbirlari to‘g‘risida”gi hujjat loyihasi joylashtirildi.

Hujjat bilan O‘zbekiston Respublikasi Mudofaa vazirligi, Milliy gvardiyasi hamda Oliy va o‘rta maxsus ta'lim vazirligining:

O‘zbekiston Respublikasi Mudofaa vazirligi va Milliy gvardiyasi tasarrufidagi mavjud harbiy akademik litseylarni “Temurbeklar maktabi” harbiy akademik litseylari etib qayta tashkil etish to‘g‘risidagi takliflariga rozilik berilishi mumkin.

Temurbeklar maktablarining asosiy vazifalari etib quyidagilar belgilanadi:

O‘zbekiston Respublikasi oliy harbiy ta'lim muassasalariga o‘qishga kirish uchun bilimdon, keng dunyoqarashga ega bo‘lgan, teran fikrlovchi, intellektual salohiyatli, jismonan baquvvat hamda o‘z xalqi va ona Vataniga sadoqat bilan xizmat qilishga tayyor nomzodlarni tayyorlash;

yoshlar orasida o‘zining qat'iy e'tiqodi, yot g‘oyalarga nisbatan qarshi tura olishi, mafkuraviy immuniteti mustahkam hamda yuksak intizomga ega, javobgarlik va mas'uliyat tushunchalari yuqori bo‘lgan yoshlarni shakllantirish;

harbiy xizmatchi uchun zarur bo‘lgan boshlang‘ich kasbiy bilim va ko‘nikmalarga, yuksak vatanparvarlik va ma'naviy-axloqiy fazilatlarga ega, yetuk va barkamol shaxs sifatida o‘z dunyoqarashlari bilan boshqalarni ergashtira oladigan yoshlarni tarbiyalash;

yetim, ota-ona qarovisiz qolgan, ijtimoiy nosog‘lom oilalarda yashayotgan, davlat va jamiyat ko‘magiga muhtoj bo‘lgan yoshlarni o‘qitish va tarbiyalash.

Belgilab qo‘yilishicha:

a) 2019/2020 o‘quv yilidan boshlab:

tegishli akademik litsey va kasb-hunar kollejlarining ikkinchi va uchinchi bosqich o‘quvchilari O‘zbekiston Respublikasi Oliy va o‘rta maxsus ta'lim vazirligining taqsimoti asosida yaqin hududdagi akademik litsey va kasb-hunar kollejlarida amaldagi o‘quv dasturlari bo‘yicha ta'lim olishni yakunlaydilar hamda akademik litsey va kasb-hunar kollejini tamomlaganlik to‘g‘risidagi davlat namunasidagi diplom oladilar;

Temurbeklar maktablarini butlash O‘zbekiston Respublikasi mudofaa vaziri va Milliy gvardiyasi qo‘mondoni tomonidan tasdiqlangan shtatlarga muvofiq amalga oshiriladi. Bunda, pedagog kadrlar lavozimlarini butlashda ustunlik yuqori malakali, ko‘p yillik pedagogik tajribaga va yuksak axloqiy fazilatlarga ega bo‘lgan mutaxassislarga beriladi;

Temurbeklar maktablariga o‘quvchilarni qabul qilish tanlov asosida O‘zbekiston Respublikasi mudofaa vaziri va Milliy gvardiyasi qo‘mondoni tomonidan tasdiqlangan qabul rejasiga muvofiq amalga oshiriladi;

Temurbeklar maktablari bitiruvchilariga O‘zbekiston Respublikasi oliy harbiy ta'lim muassasalariga o‘qishga kirishda test sinovlarida to‘plash mumkin bo‘lgan maksimal ballning 20 foizi miqdorida qo‘shimcha ballar tarzidagi imtiyoz beriladi;

O‘zbekiston Respublikasi Milliy gvardiyasi Temurbeklar maktabini imtiyozli tamomlagan bitiruvchilar dastlabki va harbiy-kasbiy tanlash natijasiga ko‘ra O‘zbekiston Respublikasi Milliy gvardiyasi Harbiy-texnik institutiga test sinovlarisiz imtiyozli o‘qishga qabul qilinadi;

Temurbeklar maktablarining axborot-resurs markazlarini zarur o‘quv, ilmiy va boshqa turdagi adabiyotlar bilan ta'minlashda O‘zbekiston Respublikasi Mudofaa vazirligi va Milliy gvardiyasi Oliy va o‘rta maxsus ta'lim vazirligi bilan hamkorlik qiladi;

Temurbeklar maktablarini maxsus adabiyotlar, sport jihozlari, zamonaviy kompyuter texnikasi, o‘quv maqsadlarga mo‘ljallangan qurol-aslaha va harbiy-texnik mulk namunalari bilan ta'minlash O‘zbekiston Respublikasi Mudofaa vazirligi va Milliy gvardiyasi tomonidan belgilangan tartibda amalga oshiriladi;

O‘zbekiston Respublikasi Prezidentining “O‘zbekiston Respublikasi Qurolli Kuchlarini yanada isloh qilish va rivojlantirish vazifalarini amalga oshirish bo‘yicha chora-tadbirlar dasturi to‘g‘risida” 2017 yil 24 yanvardagi PQ-2738-son qaroriga muvofiq oliy harbiy ta'lim muassasalariga kirish uchun nomzodlarni tayyorlash bo‘yicha tashkil etilgan akademik litseylar maxsus guruhlariga o‘quvchilarni qabul qilish to‘xtatiladi;

akademik litseylarga 2018/2019 o‘quv yiliga qadar (ushbu o‘quv yili qo‘shilgan holda) maxsus guruhlarga o‘qishga qabul qilingan o‘quvchilar o‘qishni amaldagi o‘quv dasturlari asosida belgilangan tartibda tugatadilar;

Temurbeklar maktablari o‘qituvchi lavozimlariga chuqur kasbiy bilim va mahoratga, yuksak intellektual salohiyatga va axloqiy fazilatlarga ega bo‘lgan pedagog kadrlar O‘zbekiston Respublikasi Mudofaa vazirligi va Milliy gvardiyasi tomonidan tashkil etiladigan tanlov asosida qonunchilikda belgilangan tartibda ishga qabul qilinadi;

b) Temurbeklar maktablarining noharbiy xodimlariga O‘zbekiston Respublikasi Oliy va o‘rta maxsus ta'lim vazirligi o‘rta maxsus, kasb-hunar ta'limi muassasalarining tegishli lavozimlari uchun belgilangan mehnatga haq to‘lash miqdorlari va shartlari tatbiq etiladi hamda ular qonun hujjatlarida nazarda tutilgan imtiyozlardan foydalanadi;

v) Temurbeklar maktablarida mehnatga haq to‘lash fondining 40 foizi miqdorida Temurbeklar maktablari boshlig‘i jamg‘armasi tashkil etiladi;

jamg‘arma mablag‘laridan foydalanish tartibi O‘zbekiston Respublikasi Mudofaa vazirligi va Milliy gvardiyasi tomonidan belgilanadi;

g) O‘zbekiston Respublikasi Mudofaa vazirligi noharbiy xodimlari uchun belgilangan ish staji uchun foizli ustama belgilash tartibi Temurbeklar maktablari noharbiy xodimlariga ham tatbiq etiladi;

d) Temurbeklar maktablarida o‘quvchilarga ta'lim-tarbiya berishning o‘ziga xosligidan kelib chiqqan holda hamda ta'lim-tarbiya jarayonining uzviy ravishda olib borilishini ta'minlash maqsadida, rahbar va pedagog xodimlar tushlik vaqtida Temurbeklar maktablari oshxonasida o‘quvchilar uchun belgilangan normaga muvofiq bepul ovqatlanadi;

ye) 2020 yildan boshlab muddatli harbiy xizmatni o‘tashga yaroqli hamda chaqirilish muddatini kechiktirish va chaqirilishdan ozod etish huquqiga ega bo‘lmagan, oliy harbiy ta'lim muassasalariga o‘qishga kira olmagan Temurbeklar maktablari bitiruvchilari muddatli harbiy xizmatga tanlovsiz qabul qilinadilar;

j) Temurbeklar maktablari inshootlarini Kompleks dasturga asosan mukammal ta'mirlash, qayta qurish va qurish ishlari bo‘yicha Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzuridagi “Yagona buyurtmachi xizmati” unitar korxonalari buyurtmachi hisoblanadi.